Civil.ge-ს შესახებ
Eng | ქარ | Рус
ბოლო განახლება: 18:26 - 9 დეკ.'17
RSS
Mobile
Twitter
Facebook
საქართველოს მთავრობაში მასშტაბური სტრუქტურული ცვლილებები განხორციელდება
Civil Georgia, Tbilisi / 13 ნოე.'17 / 12:36


პრემიერ-მინისტრ კვირიკაშვილის საგანგებო ბრიფინგი, 13 ნოემბერი, 2017. ფოტო: gov.ge

საქართველოს პრემიერ-მინისტრმა, გიორგი კვირიკაშვილმა, საგანგებო ბრიფინგზე დღეს „ცვლილებების ახალი ტალღა“ გამოაცხადა, რომლის ფარგლებშიც საქართველოს მთავრობაში მასშტაბური სტრუქტურული ცვლილებები განხორციელდება.

ცვლილებების შედეგად, საქართველოს მთავრობაში, დღეს არსებული 16 სამინისტროს და სახელმწიფო მინისტრების ორი აპარატის ნაცვლად, 13 სამინისტრო და სახელმწიფო მინისტრის ერთი აპარატი დარჩება. 

ენერგეტიკის სამინისტრო ეკონომიკის და მდგრადი განვითარების სამინიტროს შეუერთდება, ხოლო გარემოს და ბუნებრივი რესურსების დაცვის სამინისტრო გაიყოფა. ამ უკანასკნელის ბუნებრივი რესურსების მართვის კომპონენტი ეკონომიკის სამინისტროს გადაეცემა, ხოლო გარემოს დაცვის მიმართულება სოფლის მეურნეობის სამინისტროს კომპეტენციაში შევა. ახალ სამინისტროს გარემოს დაცვის და სოფლის მეურნეობის სამინისტრო ეწოდება.

გარემოს დაცვის და ბუნებრივი რესურსების სამინისტროს მსგავსად, სპორტისა და ახალგაზრდობის საქმეთა სამინისტროც გაიყოფა. სპორტის კომპონენტი კულტურისა და ძეგლთა დაცვის სამინისტროს კომპეტენციაში შევა, ახალგაზრდობის საქმეთა მართვა კი, განათლების და მეცნიერების სამინისტროს სისტემაში მოექცევა. 

უქმდება სახელმწიფო მინისტრის აპარატი ევროპულ და ევროატლანტიკური ინტეგრაციის საკითხებში, რომელიც საგარეო საქმეთა სამინისტროს შეუერთდება. შედეგად, სახელმწიფო მინისტრების აპარატებიდან, საქართველოს მთავრობის სისტემაში ფუნქციონირებას მხოლოდ შერიგებისა და სამოქალაქო თანასწორობის საკითხებში სახელმწიფო მინისტრის აპარატი განაგრძობს.

ცვლილებები შეეხება ძალოვან სტრუქტურებსაც. შინაგან საქმეთა სამინისტროში დღეს მოქმედი საგანგებო სიტუაციების მართვის სააგენტოსა და სახელმწიფო უსაფრთხოებისა და კრიზისების მართვის საბჭოს შერწყმისა და რეორგანიზაციის შედეგად, იქმნება საგანგებო სიტუაციების მართვის ცენტრი. გარდა ამისა, სახელმწიფო უსაფრთხოების სამსახურს შეუერთდება საგარეო დაზვერვის სამსახური, რომელიც აქამდე პრემიერ-მინისტრის უშუალო დაქვემდებარებაში არსებულ სპეციალური დანიშნულების დაწესებულებას წარმოადგენდა.

სტრუქტურულ რეორგანიზაციას საკადრო ცვლილებებიც მოჰყვება. ეკონომიკისა და მდგრადი განვითარების სამინისტროს უხელმძღვანელებს დიმიტრი ქუმსიშვილი, რომელსაც ფინანსთა მინისტრის პოსტზე „საქართველოს რკინიგზის" გენერალური დირექტორი, მამუკა ბახტაძე შეცვლის. დიმიტრი ქუმსიშვილი ვიცე-პრემიერის თანამდებობას შეინარჩუნებს. 

შინაგან საქმეთა მოქმედი მინისტრი, გიორგი მღებრიშვილი საგანგებო სიტუაციების მართვის ცენტრს ჩაუდგება სათავეში, მის ნაცვლად კი, შსს-ს ეკონომიკის მოქმედი მინისტრი, გიორგი გახარია უხელმძღვანელებს. გახარია ასევე ვიცე-პრემიერის პოსტსაც დაიკავებს.

სტრუქტურული რეორგანიზაციის შემდეგ, საგარეო საქმეთა სამინისტროს კვლავ მიხეილ ჯანელიძე უხელმძღვანელებს, რომელიც ასევე ვიცე-პრემიერის პოსტსაც შეინარჩუნებს. 

ალექსანდრე ჯეჯელავას ნაცვლად, განათლებისა და მეცნიერების სამინისტროს თბილისის სახელმწიფო უნივერსიტეტის პრორექტორი მიხეილ ჩხენკელი უხელმძღვანელებს. გარემოს დაცვის და სოფლის მეურნეობის მინისტრად ლევან დავითაშვილი დაინიშნება, რომელიც დღესაც სოფლის მეურნეობის სამინისტროს ხელმძღვანელობს. სპორტის კომპონენტის კულტურისა და ძეგლთა დაცვის სამინისტრო კომპეტენციაში შესვლის შემდეგ კი, მინისტრის პოსტს მიხეილ გიორგაძე შეინარჩუნებს.

საქართველოს მთავრობის სტრუქტურული რეორგანიზაცია საკანონმდებლო ცვლილებების განხორციელებას, ასევე პარლმენტის მიერ მთავრობის განახლებული შემადგენლობისთვის ნდობის გამოცხადებას მოითხოვს. 

პრემიერ-მინისტრ კვირიკაშვილის განცხადებით, მთავრობა პარლამენტს შესაბამისი ცვლილებების პაკეტს უახლოეს მომავალში წარუდგენს. მთავრობის ახალი შემადგენლობისათვის ნდობის გამოცხადება კი, წლის ბოლომდე მოხდება.

„მინდა ხაზგასმით აღვნიშნო, რომ დაგეგმილი ცვლილებები მოემსახურება მეტ პროგრესს, თანამედროვე სახელმწიფოსა და კიდევ უფრო მეტად მოქნილი სახელმწიფო აპარატის ჩამოყალიბებას, რაც თავისთავად, ადმინისტრაციული დანახარჯების მაქსიმალურ შემცირებას შეუწყობს ხელს“, - განაცხადა მთავრობის სტრუქტურულ რეორგანიზაციაზე საუბრისას პრემიერ-მინისტრმა, გიორგი კვირიკაშვილმა.

მისივე თქმით, „ცვლილებები მაქსიმალურად უმტკივნეულოდ, არა რადიკალურად, არამედ ევოლუციურად“ განხორციელდება, რაც ქართული ოცნების „ხელწერას“ წარმოადგენს.

უახლესი ამბები
09 დეკ.'17 18:26
ეუთოში საქართველოს მეგობარი ქვეყნების ჯგუფი რუსული ოკუპაციის ფონზე მხარდაჭერას უსვამს ხაზს
სხვა საკითხებთან ერთად ჯგუფი ეთნიკური დისკრიმინაციის, რუსეთის სამხედრო ძალების გაძლიერების საკითხებზე საუბრობს.
09 დეკ.'17 14:34
უკრაინის ეროვნულმა პოლიციამ სააკაშვილი დააკავა
ექს-პრეზიდენტმა შიმშილობა დაიწყო და შესაძლოა შინაპატიმრობა შეეფარდოს.
08 დეკ.'17 17:21
ჯანელიძე ეუთოს საგარეო საქმეთა მინისტრთა საბჭოს სხდომაში მონაწილეობს
საგარეო საქმეთა მინისტრმა ოკუპირებულ ტერიტორიებზე არსებულ დარღვევებზე ისაუბრა და მოუწოდა, რომ შეიქმნას ევროპა გავლენის სფეროების გარეშე.
08 დეკ.'17 11:45
საგარეო საქმეთა სამინისტრო იერუსალიმთან დაკავშირებულ მოვლენებს ეხმაურება
სამინისტროს განცხადება მოჰყვა მმართველი პარტიის დეპუტატის ინიციატივას იერუსალიმის ისრაელის დედაქალაქად აღიარების თაობაზე.
07 დეკ.'17 19:32
პარლამენტმა მთავრობის სტრუქტურულ რეორგანიზაციას მხარი დაუჭირა
ცვლილებების ფარგლებში, რამდენიმე სამინისტრო შერწყმა და რეორგანიზაცია მოხდება.
07 დეკ.'17 17:02
კვირიკაშვილი იერუსალიმის შესახებ ღია წერილის გამო დეპუტატს საყვედურობს
პრემიერ-მინისტრმა უარყო დეპუტატის მოწოდება, რომ საქართველომ იერუსალიმთან დაკავშირებით პრეზიდენტ ტრამპის გადაწყვეტილება გაიზიაროს.
07 დეკ.'17 14:44
საქართველოს საპარლამენტო დელეგაცია შვედეთს სტუმრობს
ირაკლი კობახიძე შვედეთის მეფე კარლ გუსტავ XVI-ს, პარლამენტის თავმჯდომარეს და საგარეო საქმეთა მინისტრს შეხვდა.
07 დეკ.'17 13:39
არასამთავრობოებმა უკრაინაში ქართველი ჟურნალისტების არშეშვების გამო შეშფოთება გამოთქვეს
უკრაინაში შესვლაზე უარი ტელეკომპანიების რუსთავი2-ის, TV პირველის და საზოგადოებრივი მაუწყებლის ჟურნალისტებს უთხრეს.
07 დეკ.'17 12:56
სააკაშვილის მხარდასაჭერად თბილისში აქცია გაიმართა
ენმ-ის წევრებმა და აქტივისტებმა უკრაინაში სააკაშვილის დაკავება გააპროტესტეს.
06 დეკ.'17 18:35
მმართველი გუნდის ნაწილი გარემოს დაცვის სამინისტროს რეორგანიზაციის პროექტს აკრიტიკებს
აზრთა სხვადასხვაობის მიუხედავად, საპარლამენტო უმრავლესობა მთავრობის სტრუქტურული რეორგანიზაციის გეგმას დაჩქარებული წესით დაამტკიცებს.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
76