Civil.ge-ს შესახებ
Eng | ქარ | Рус
ბოლო განახლება: 18:32 - 17 ნოე.'17
RSS
Mobile
Twitter
Facebook
პრეზიდენტი საკონსტიტუციო ცვლილებების პროექტის გადახედვის ინიციატივით გამოდის
Civil Georgia, Tbilisi / 11 სექ.'17 / 18:50


შეხვედრა პრეზიდენტის ადმინისტრაციაში, 11 სექტემბერი, 2017. ფოტო: president.gov.ge

საქართველოს პრეზიდენტი გიორგი მარგველაშვილი საკონსტიტუციო ცვლილებებთან დაკავშირებით ახალი ინიციატივით გამოდის და ოპოზიციურ პარტიებს კონსტიტუციის პროექტის ახალი ვერსიის შემუშავებას სთავაზობს, იმ ძირითადი საკითხების შესწორებით, რომელზეც მმართველ გუნდსა და ოპოზიციურ ძალებს შორის კონსენსუსი ვერ შედგა.

ამ ინიციატივით გიორგი მარგველაშვილი 11 სექტემბერს,  პრეზიდენტის სასახლეში ოპოზიციური პარტიების წარმომადგენლებთან შეხვედრის დროს გამოვიდა. 

„სრულიად შესაძლებელი იყო კონსტიტუცია დაწერილიყო სრულიად სხვა პროცესის შედეგად, სრულიად სხვა ლოგიკით, სრულიად სხვა აქცენტებით“, - აღნიშნა გიორგი მარგველაშვილმა, თუმცა იქვე დასძინა, რომ ორი მოსმენით მიღებული საკონსტიტუციო ცვლილებები „პოლიტიკური ფაქტია“, რომელიც პატივისცემას იმსახურებს.

„ეს დოკუმენტი ავიღოთ, მოვნიშნოთ ის პუნქტები, რომლებიც ძირითადი წინააღმდეგობის თემა იყო, დავწეროთ ჩვენი ვერსია, ის რომელზეც შეთანხმდებით თქვენ, მიუხედავად განსხვავებული პოლიტიკური შეხედულებისა, და ეს შევთავაზოთ მმართველ პოლიტიკურ ძალას როგორც გამოსავალი“, - განაცხადა გიორგი მარგველაშვილმა.

პრეზიდენტის ინიციატივა დადებითად შეაფასეს საპარლამენტო და არასაპარლამენტო ოპოზიციური ძალების წარმომადგენლებმა და გამოთქვეს მზადყოფნა, ჩაერთონ დოკუმენტის შემუშავებაში.

„მნიშვნელოვანია, რომ იყო კონსესუსის შედეგად მიღებული დოკუმენტი, რომელიც ალტერნატივის სახით იქნება შეთავაზებული უკვე პრეზიდენტის მიერ“, - განუცხადა ჟურნალისტებს შეხვედრის შემდეგ ერთიანი ნაციონალური მოძრაობის ერთ-ერთმა ლიდერმა, ნიკა მელიამ.

„ჩვენ ცხადია ვუერთდებით ამ ინიციატივას. ჩვენ შეუერთდით ყველა ინიციატივას, რომელიც მიზანს ისახავდა, რომ შემდგარიყო ზოგადად კონსენსუსი კონსტიტუციის გარშემო. კიდევ ერთხელ გამოავლინა ოპოზიციამ მცდელობა, რომ პროცესი რაღაცნაირად განიმუხტოს და ნორმალური მიმართულებით წავიდეს, მაგრამ ყველას კარგად უნდა გვესმოდეს, რომ რეალობა არის ის, რომ ხელისუფლება არ არის დაინტერესებული კონსენსუსში“, - განაცხადა ევროპული საქართველოს წევრმა, ელენე ხოშტარიამ.

„ჩვენ გვექნება საერთო დოკუმენტი იმ პრინციპულ საკითხებთან დაკავშირებით, რომლებსაც აქამდეც ვაფიქსირებდით... ჩვენ მივცემთ ქართულ ოცნებას კიდევ ერთ შანსს, რომ შეინარჩუნოს სახე და არ მოირგოს კონსტიტუცია საკუთარ თავზე“, - აღნიშნა ახალი საქართველოს ლიდერმა, გიორგი ვაშაძემ.

მმართველი გუნდის, ქართული ოცნების წარმომადგენლებმა პრეზიდენტის ეს ინიციატივა უსაფუძვლო მცდელობად შეაფასეს და განაცხადეს, რომ კონსტიტუცია ორი მოსმენით უკვე მიღებულია.

“მე არ ვიცი რა მიზანს შეიძლება ემსახურებოდეს მისი ეს ინიციატივა. მე ერთი რამე შემიძლია ვთქვა, რომ კონსტიტუციის კანონის პროექტი, ძალიან მნიშვნელოვანი, რომელიც ქვეყნის დემოკრატიულ განვითარებას აუცილებლად უზრუნველყოფს, დღეს არის ორი მოსმენით მიღებული და, მას შემდეგ, რაც ჩვენ ვენეციის კომისიის დასკვნა გვექნება, მესამე მოსმენითაც მივიღებთ“, - განაცხადა, დეპუტატმა ქართული ოცნებიდან, გიორგი კახიანმა.

ჯერ-ჯერობით უცნობია, როდის დაიწყება პოლიტიკური პარტიების სამუშაო შეხვედრები პრეზიდენტის ინიციატივასთან დაკავშირებით.

საკონსტიტუციო ცვლილებების თაობაზე ხელისუფლებისა და ოპოზიციური პარტიების დიალოგის მორიგი მცდელობა აგვისტოს ბოლოს უშედეგოდ დასრულდა. გაუქმდა ვენეციის კომისიის შუამავლობით 6 სექტემბერს სტრასბურგში დაგეგმილი მოლაპარაკებებიც. ოპოზიციამ საკონსტიტუციო რეფორმის პროცესში „კონსენსუსის მიუღწევლობის პასუხისმგებლობა“ ქართული ოცნების ხელისუფლებას დააკისრა.

საკონსტიტუციო ცვლილებების პროექტში, რომელიც პარლამენტმა პირველი და მეორე მოსმენით უკვე მიიღო, ოპოზიციური სპექტრის ძირითად უკმაყოფილებას საარჩევნო პროცესთან დაკავშირებული ნორმები იწვევს.

ოპოზიცია საპარლამენტო არჩევნების პროპორციულ სისტემაზე გადასვლის ვადის 2024 წლამდე გახანგრძლივებას და  პარტიებისთვის საარჩევნო ბლოკებად გაერთიანების უფლების ჩამორთმევას აპროტესტებს.

საკონსტიტუციო ცვლილებების მესამე მოსმენით მიღება საშემოდგომო სესიაზე იგეგმება.

უახლესი ამბები
17 ნოე.'17 18:32
სახალხო დამცველმა აფხაზეთის გამშვები პუნქტების დახურვაზე ანგარიში გამოაქვეყნა
უჩა ნანუაშვილს მიაჩნია, რომ გალში ადამიანის უფლებების მდგომარეობა „უფრო და უფრო უარესდება“.
17 ნოე.'17 16:48
პრაღაში აბაშიძის და კარასინის მორიგი შეხვედრა გაიმართა
მოსკოვის თქმით, 2011 წლის ვმო-ს შეთანხმებაზე ექსპერტების შეხვედრა გაიმართება.
17 ნოე.'17 15:37
არასამთავრობოები პარტიების დაფინანსების წესში საპარლამენტო უმრავლესობის წარმომადგენელთა მიერ ინიცირებულ ცვლილებებს ეწინააღმდეგებიან
საია-მ, საერთაშორისო გამჭვირვალობა-საქართველომ და სამართლიანმა არჩევნებმა ერთობლივი განცხადება გაავრცელეს.
17 ნოე.'17 13:28
შინაგან საქმეთა მინისტრის სამი მოადგილე დაინიშნა
ახალ მინისტრს, გიორგი გახარიას, სამი მოადგილე ჰყავს.
16 ნოე.'17 18:31
საქართველომ „ლაპის ლაზულის“ სატრანზიტო დერეფნის შეთანხმებას მოაწერა ხელი
საქართველოსთან ერთად, შეთანხმებას ხელი ავღანეთის, თურქმენეთის, აზერბაიჯანის და თურქეთის წარმომადგენლებმაც მოაწერეს.  
16 ნოე.'17 17:56
აშშ-ის მიერ დაფინანსებული ახალი პროგრამა საქართველოს ტერიტორიის თავდაცვისკენ იქნება მიმართული
თავდაცვის მინისტრმა ლევან იზორიამ აშშ-ში ვიზიტის დროს წვრთნის ახალ პროგრამაზე ისაუბრა.
16 ნოე.'17 17:50
სახალხო დამცველი მომავალი ომბუდსმენის შერჩევაში „საზოგადოების მონაწილეობის“ აუცილებლობაზე საუბრობს
არასამთავრობო სექტორში ომბუდსმენის პოსტზე რამდენიმე კანდიდატურა განიხილება.
16 ნოე.'17 11:52
СENN გარემოს დაცვის სამინისტროს რეორგანიზაციის ფართო განხილვას მოითხოვს
კავკასიის გარემოსდაცვითი არასამთავრობო ორგანიზაციების ქსელმა მთავრობის სტრუქტურულ რეორგანიზაციასთან დაკავშირებით განცხადება გაავრცელა.
15 ნოე.'17 18:49
პოლონეთის და შვედეთის საგარეო საქმეთა მინისტრებმა საქართველოს ევროპული მისწრაფებების მხარდაჭერა დაადასტურეს
ვიტოლდ ვაშჩიკოვსკი და მარგოტ ვალსტრომი აღმოსავლეთ პარტნიორობის სამიტის წინ საქართველოს ხელმძღვანელობას შეხვდნენ.
15 ნოე.'17 13:20
პუტინი მოსკოვში სამხრეთ ოსეთის ლიდერს შეხვდა
მოსკოვის გადაწყვეტილებით, სავალდებულო სამედიცინო დაზღვევის პროგრამა ცხინვალის რეგიონში მცხოვრებ რუსეთის მოქალაქეებზეც გავრცელდება.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
70