Civil.ge-ს შესახებ
Eng | ქარ | Рус
ბოლო განახლება: 23:53 - 22 სექ.'17
RSS
Mobile
Twitter
Facebook
სააკაშვილი მთავრობას ევროპის სახალხო პარტიასთან „კონფლიქტური კორესპონდენციის გაცვლის“ გამო აკრიტიკებს
სივილ ჯორჯია, თბილისი / 18 მარ.'13 / 20:27

პრეზიდენტმა სააკაშვილმა გააკრიტიკა ბიძინა ივანიშვილის მთავრობა ევროპის სახალხო პარტიასთან „კონფლიქტური კორესპონდენციის გაცვლის“ გამო და იმავდროულად, მოუწოდა, რომ შიდა და გარე ასპარეზზე ერთმანეთის „ლანძღვის“ ნაცვლად, პრეზიდენტი და მთავრობა „ერთი ხმით ველაპარაკოთ ევროპას“.

6 მარტს ევროპარლამენტის 23 წევრმა, მათ შორის 19–მა სახალხო პარტიიდან, პრემიერ–მინისტრ ივანიშვილს ღია წერილი გაუგზავნა, სადაც ადანაშაულებენ იმაში, რომ მან საქართველო ევროპის გზას ჩამოაშორა. 10 მარტის საპასუხო წერილში პარლამენტის თავმჯდომარემ დავით უსუფაშვილმა გააკრიტიკა ევროპარლამენტართა ჯგუფი „სიცრუეზე დაფუძნებული“ განცხადებების გამო და მოუწოდა მათ თავი შეიკავონ მსგავსი წერილების ხელმოწერისგან, რადგან „ამის გამო მალე თავადვე შერცხვებათ“. შემდეგ პრემიერ–მინისტრმა ივანიშვილმა 14 მარტს ცალკე ღია წერილი გამოაქვეყნა, სადაც მოუწოდა ევროპის სახალხო პარტიას, რომ საქართველოში გრძელვადიანი დამკვირვებლები გამოაგზავნოს, რომლებიც მის წინააღმდეგ ბრალდებების გამოთქმამდე, ადგილზე გაეცნობიან არსებულ ვითარებას. 

13 მარტს ევროპის სახალხო პარტიის თავმჯდომარეობამ დეკლარაცია მიიღო, რომელიც 14 მარტს გამოქვეყნდა ბრიუსელში პარტიის გაფართოებულ სხდომაზე, რომელშიც პრეზიდენტმა სააკაშვილმაც მიიღო მონაწილეობა. სახალხო პარტიის განცხადებით, დეკლარაცია წარმოადგენს საგზაო რუკას, თუ როგორ უნდა აღდგეს საქართველოს ევრო–ატლანტიკური ინტეგრაციის პროცესი. დეკლარაცია სინანულს გამოხატავს იმასთან დაკავშირებით, რომ 2012 წლის ოქტომბრის არჩევნების შემდეგ „დემოკრატიული სტანდარტების თვალსაზრისით უკან გადადგმულმა ნაბიჯებმა საქართველოს პოზიტიურ იმიჯს ზიანი მიაყენა“; ასევე "საფრთხის ქვეშაა" ასოცირების ხელშეკრულების შესახებ მოლაპარაკებების დასრულების შემდეგ, ამ ხელშეკრულების ხელმოწერა და რატიფიცირება. მასში ნათქვამია, რომ დემოკრატიული სტანდარტების, სასამართლო სისტემის და მედიის თავისუფლების პატივისცემა  საშუალებას მისცემს საქართველოს „გააღრმავოს ევროპის კავშირთან დაახლოების პროცესი“.

15 მარტს საქართველოს მთავრობამ გამოაქვეყნა მემორანდუმი, სადაც ევროპის სახალხო პარტიის თავმჯდომარეობის დეკლარაციაში ასახულ თითოეულ პუნქტს უპასუხა. ამას გარდა, 15 მარტს მთავრობამ თავის ვებგვერდზე პრეს–რელიზი გაავრცელა, სადაც ევროპის სახალხო პარტიას ნაციონალური მოძრაობის მიერ მთავრობის წინააღმდეგ წაყენებული „დაუსაბუთებელი ბრალდებების“ გახმოვანების გამო აკრიტიკებს. პრეს–რელიზის თანახმად, „ეს იმას ნიშნავს, რომ სახალხო პარტიას არ შესწევს უნარი, ჩამოაყალიბოს საკუთარი პოლიტიკური დასკვნები საქართველოში არსებული ვითარების შესახებ“.

„არ შეიძლება ასეთი წერილებით ლაპარაკი ევროპის მთავარ პარტიებთან. არ შეიძლება აკეთო ის, რომ ელაქუცო [რუსეთის საგარეო საქმეთა მინისტრის მოადგილეს გრიგორი] კარასინს და  საშინელი რაღაცეები უწოდო და ყველანაირ უბედურებაში ბრალი დადო ევროპარლამენტის ლიდერებს. არ შეიძლება, რომ მერკელის, სარკოზის, ბაროზოს პარტიას უხეშად ლანძღავდე და ამავე დროს, მუხლებზე დაფორთხავდე მესამეხარისხოვანი ონიშჩენკოს მიერ გამოგზავნილი რუსი ჩინოვნიკების წინაშე. ეს არ არის ქართული სტილი, ეს არ არის ის, რასაც ჩვენ ამდენი წელი ყველა ერთად ვამკვიდრებდით, ჩემო მეგობრებო“, - განაცხადა სააკაშვილმა 18 მარტს თავის სატელევიზიო მიმართვაში.

„საუბარი არის საქართველოს ღირსებაზე“, - განაგრძო მან, „ღირსება არ არის ის, რომ ჩვენ მეგობრებს, ვინც 2008 წლის ომში გადაარჩინა საქართველოს დამოუკიდებლობა, ვინც აქ ჩვენთან ერთან იდგა მოედანზე, მრავალი ევროპელი ლიდერი... იმ ხალხს, რომელიც ყოველდღიურად გვეხმარება, იმ ხალხს, რომელზეც დგას დღეს საქართველოს სუვერენიტეტი მრავალი ასპექტით, ის ხალხი, მაგალითად, ვიზეც დგას არ აღიარების პოლიტიკა, რომ გასწია რუსეთი... და ამათი დახმარებით გავაჩერეთ და ბევრ ადგილზე ამათი დახმარებით გადავახედიეთ უკანონო აღიარების საკითხი, სწორედ ევროპელები გვეხმარებოდნენ ამაში, პირველ რიგში. როგორ შეიძლება ჩვენ ევროპას ასე უხეშად ველაპარაკოთ?“

სააკაშვილის თქმით, ეს გზა ქვეყანას მიიყვანს „ჩიხში“ იმ ფონზე, როცა ახლოვდება შემოდგომაზე დაგეგმილი ევროკავშირის აღმოსავლეთ პარტნიორობის სამიტი ვილნიუსში, სადაც, მისი თქმით, საქართველოს ევროპული პერსპექტივის შანსი უჩნდება და რომლის ხელიდან გაშვებითაც „ყველანი დავზარალდებით -  ოპოზიციაც, უმრავლესობაც“.

„ის ანტიევროპული ძალები, რომლებიც დღეს მოქმედებენ, ისე გაგვიხდიან საქმეს, რომ ჩვენ არსად აღარ გვექნება წასასვლელი გარდა იმისა, რომ მუხლებზე მიფორთხდეთ ისევ ჩვენ დამპყრობელთან. ქართველი ხალხი მუხლებზე არასოდეს არ დაიჩოქებს და ისევ შეიძლება აღმოვჩნდეთ გამოუვალ სიტუაციაში“, - განაცხადა მან.

„ამიტომ, მე მინდა საქართველოს მთავრობას შევთავაზო, რომ ასე კი არ ვილაპარაკოთ ეპისტოლარულ ჟანრში... [არამედ] დავჯდეთ ერთად, შევიმუშაოთ სერიოზული კონცეფცია, ერთი ხმით ველაპარაკოთ ევროპას, მაგრამ ეს ყველაფერი ნიშნავს ასევე იმ ფასეულობებზე დგომას, რომელსაც ეფუძნება ევროპული არჩევანი. ეს ფასეულობები არის დემოკრატია, თავისუფალი მართლმსაჯულება, თავისუფალი მედია, კონსტიტუციონალური დიალოგი, ცივილიზებული ფარგლები ჩვენი ქვეყნისთვის და თავისუფალი არჩევანი საქართველოს თითოეული მოქალაქისთვის“.

„ამ პირობებში ჩვენს ევროპულ არჩევანს ვერაფერი ვეღარ დაუდგება წინ. და მე მინდა ყველამ ამ მიმართულებით ვიმოძრაოთ“, - აღნიშნა მან.

მარტის დასაწყისში პრეზიდენტმა სააკაშვილმა და პრემიერ-მინისტრმა ივანიშვილმა გამოთქვეს მზაობა, რომ ერთობლივი განცხადება გააკეთონ საქართველოს ევროატლანტიკური და ევროპული კურსის ერთგულების თაობაზე.

უახლესი ამბები
22 სექ.'17 23:53
საქართველოს ხელისუფლება ოკუპირებულ სამხრეთ ოსეთში ქართველთა სახლების განადგურებას ეხმაურება
სოფელ ერედვში მიმდინარე სამუშაოებს საქართველოს ხელისუფლება „გენოციდის გაგრძელებად“ აფასებს. 
22 სექ.'17 22:53
მთავრობამ აშშ-ში ლობირებისთვის თითქმის მილიონი დახარჯა
სულ ბოლოს მთავრობამ კომპანია StrateVarious LLC-სთან მოაწერა კონტრაქტს ხელი.
22 სექ.'17 17:17
კვირიკაშვილი: საქართველო იზრდება, ის არის სიცოცხლით სავსე და მტკიცე გამოწვევებთან ბრძოლაში
საქართველოს პრემიერ-მინისტრი გაეროს გენერალურ ასამბლეაზე სიტყვით გამოვიდა.
22 სექ.'17 17:00
ადგილობრივ არჩევნებზე 23 პარტია, 5 საარჩევნო ბლოკი და 200-ზე მეტი საინიციატივო ჯგუფი დარეგისტრირდა
რამდენიმე დღეში საარჩევნო ადმინისტრაცია სარეგისტრაციო პროცედურებს დაასრულებს და კანდიდატთა საბოლოო სიებს გამოაქვეყნებს.
22 სექ.'17 12:00
პრემიერ-მინისტრის გამოსვლა გაეროს გენერალურ ასამბლეაზე
გიორგი კვირიკაშვილი ნიუ-იორკში საქართველოს დელეგაციას ხელმძღვანელობს. 
21 სექ.'17 18:36
რუსეთი სოხუმში საბაჟო პუნქტს გახსნის
პუნქტი მთელ აფხაზეთს მოიცავს, რუსეთის კანონმდებლობით იმუშავებს, მისი თანამშრომლები კი იმუნიტეტით ისარგებლებენ.
21 სექ.'17 18:19
მმართველი პარტია ბონუსის სისტემაზე უარს ამბობს
მომდევნო საპარლამენტო არჩევნებზე, პარტიებს საარჩევნო ბლოკებში გაერთიანების უფლება ექნებათ.
21 სექ.'17 17:49
რესპუბლიკური პარტია ერთნაირი სქესის მქონე პირთათვის სამოქალაქო პარტნიორობას ლობირებს
პარტიამ 2016 წლის საპარლამენტო არჩევნებში დამოუკიდებლად მიიღო მონაწილეობა, თუმცა ხმების საკმარისი რაოდენობა ვერ მოიპოვა.
21 სექ.'17 12:04
საქართველო ღია მმართველობის პარტნიორობის თავმჯდომარე გახდა
პრემიერ-მინისტრმა კვირიკაშვილმა OGP-ის თავმჯდომარეობა საფრანგეთის პრეზიდენტისგან ოფიციალურად გადაიბარა.
20 სექ.'17 17:58
რუსი მინისტრი: მოსკოვი სამხრეთ ოსეთის მიმართ აღებულ ფინანსურ ვალდებულებებს ‘ადასტურებს’
მინისტრი ჩრდილოეთ კავკასიის საკითხებში ლევ კუზნეცოვი ორდღიანი სამუშაო ვიზიტით ცხინვალს სტუმრობს.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
83