Civil.ge-ს შესახებ
Eng | ქარ | Рус
ბოლო განახლება: 18:12 - 19 აპრ.'18
RSS
Mobile
Twitter
Facebook
სასამართლომ უგულავას მიმართ პროკურატურის არც ერთი შუამდგომლობა არ დააკმაყოფილა
სივილ ჯორჯია, თბილისი / 25 თებ.'13 / 18:35


სატელევიზიო კადრი, სადაც თბილისის მერი გიგი უგულავა 23 თებერვალს ფინანსთა სამინისტროს საგამოძიებო სამსახურის წინ მხარდამჭერებს მიმართავს მას შემდეგ, რაც  მას ოფიციალურად წარუდგინეს ბრალი გამომძიებლებთან შეხვედრისას, რა დროსაც მან დუმილის უფლება გამოიყენა.

თბილისის საქალაქო სასამართლომ არ დააკმაყოფილა პროკურატურის შუამდგომლობა 1 მილიონი ლარის გირაოს შეფარდების და თანამდებობრივი უფლებამოსილების შეჩერების თაობაზე თბილისის მერისთვის გიგი უგულავასთვის, რომელსაც დიდი ოდენობით საბიუჯეტო თანხების მითვისება-გაფლანგვასა და ფულის გათეთრებასთან დაკავშირებულ საქმეებზე აქვს ბრალი წარდგენილი.

სასამართლომ ასევე არ დააკმაყოფილა პროკურატურის შუამდგომლობა, რომელიც უგულავას ქვეყნის დატოვებას აუკრძალავდა.

მერისთვის უფლებამოსილების შეჩერების შუამდგომლობის თაობაზე, რომელიც ცალკე განიხილებოდა, თბილისის საქალაქო სასამართლომ განაცხადა: "ვინაიდან ბრალდების მხარის მიერ შუამდგომლობაში მითითებული თბილისი მერის თანამდებობიდან გადაყენების საფუძვლები იყო ზოგადი და დაუსაბუთებელი, სასამართლოს განჩინებით ბრალდების მხარეს უარი ეთქვა შუამდგომლობის დაკმაყოფილებაზე და გიორგი უგულავა არ იქნა გადაყენებული თანამდებობიდან".

უგულავას საქმეზე წინასწარი სასამართლო მოსმენა 10 აპრილისთვის არის დანიშნული.

სასამართლო დარბაზში ადვოკატის გვერდით მჯდომმა უგულავამ განუცხადა მოსამართლეს, რომ მის წინააღმდეგ წაყენებული ბრალდებები პოლიტიკურად მოტივირებულია.

მანამდე 25 თებერვალს, როდესაც სასამართლო მისთვის 1 მილიონი ლარის გირაოს შეფარდების საკითხს განიხილავდა, უგულავამ განაცხადა, რომ თავს დამნაშავედ არ მიიჩნევს; მან განუცხადა მოსამართლეს, რომ იგი 1 მილიონ ლარს ვერ გადაიხდის, რადგანაც არ აქვს.  

ქვეყნიდან გაუსვლელობის თაობაზე პროკურატურის მოთხოვნის შესახებ უგულავამ განაცხადა, რომ ამგვარი აკრძალვის დაწესება  ჩაშლიდა მის ვიზიტს აზერბაიჯანში, სადაც ის რამდენიმე დღეში უნდა გაემგზავროს იმ დელეგაციის შემადგენლობაში, რომელსაც პრეზიდენტი სააკაშვილი უხელმძღვანელებს.

მოსამართლის გადაწყვეტილებას, რომელმაც არ დააკმაყოფილა პროკურატურის შუამდგომლობა გირაოს შეფარდების და ქვეყნიდან გაუსვლელობის თაობაზე, დარბაზში მსხდომი უგულავას მხარდამჭერები ტაშით შეხვდნენ. თავად უგულავამ განაცხადა, რომ სასამართლოს გადაწყვეტილება „ლოგიკური“ იყო.

სისხლის სამართლის ბრალდება უგულავას 23 თებერვალს ორ დამოუკიდებელ ეპიზოდთან დაკავშირებით წარედგინა მისი დაკავების გარეშე.

ფინანსთან სამინისტროს საგამოძიებო სამსახურის თქმით, ტელეიმედის „ხელში ჩაგდების დანაშაულებრივ სქემასთან“ დაკავშირებით, რაც თავის მხრივ უკავშირდება რიყის ტერიტორიის გასხვისების საქმეს, უგულავას ბრალი წარედგინა უკანონო შემოსავლების ლეგალიზაციის თაობაზე სისხლის სამართლის 194-ე მუხლის მესამე ნაწილით, რაც ისჯება თავისუფლების აღკვეთით 9-დან 12 წლამდე; და მითვისება-გაფლანგვის თაობაზე 182-ე მუხლის მეორე და მესამე ნაწილით, რაც ითვალისწინებს თავისუფლების აღკვეთას, შესაბამისად, 4-დან 7 წლამდე და 7-დან 11 წლამდე, ასევე თანამდებობის დაკავების ან საქმიანობის უფლების ჩამორთმევას ვადით 3 წლამდე.

182-ე მუხლის მეორე და მესამე ნაწილის დარღვევას ედავება თბილისის მერს გამოძიება მეორე ეპიზოდთან დაკავშირებითაც, რომელიც ნაციონალური მოძრაობის აქტივისტების მერიის დასუფთავების სამსახურში ფიქტიური დასაქმების საქმეს უკავშირდება.

უგულავას თქმით, მის წინააღმდეგ წაყენებული ბრალდებები „აბსურდულია“ და პრემიერ–მინისტრ ბიძინა ივანიშვილის იმ მცდელობის ნაწილია, რაც „თბილისის მერიის ხელში ჩაგდებას და დაპატრონებას“ ისახავს მიზნად.  

გამოძიების ინფორმაციით, 2008 წლის მდგომარეობით იმედის საკონტროლო პაკეტის მფლობელი იყო ჯოზეფ ქეი, რომელსაც იმ დროისთვის ტელეკომპანიის ფუნქციონირებისათვის დახარჯული ჰქონდა 10 მლნ აშშ დოლარი. მას ხელისუფლების სახელით დაუკავშირდა თავდაცვის ყოფილი მინისტრი დავით კეზერაშვილი, შეხვდა და „პირდაპირი მუქარით დაიყოლია“ ტელეიმედის დათმობაზე, იმ ერთადერთი პირობით, რომ მას გიგი უგულავა აუნაზღაურებდა 10 მლნ აშშ დოლარის გაწეულ ხარჯებს.

გამოძიების ინფორმაციით, „უგულავას მითითებით, ჯოზეფ ქეიმ თავისი წილი გადასცა კეზერაშვილის კონტროლს დაქვემდებარებულ, პანამაში რეგისტრირებულ კომპანია  „bordex limited“-ს, ხოლო თანხის გადახდა  განხორციელდა შემდეგი გეგმით: გიორგი უგულავა მოელაპარაკა  შპს „ახალი რიყის“ მესაკუთრეებს, რომ მათ მიერ 2006 წელს 7 000 000 აშშ დოლარად შეძენილ რიყის ტერიტორიას მერია ვითომდა 17 000 000 აშშ დოლარად უკან გამოისყიდდა, საიდანაც 10 000 000 აშშ დოლარი გათვალისწინებული იყო ჯოზეფ ქეისათვის გადასაცემად. ქალაქის მერიამ 2008 წლის 29 დეკემბერს,  ქ.თბილისის მთავრობის სახელით გამოსცა დადგენილება, რომლის საფუძველზეც თბილისის მერიის მიერ დაფუძნებული „ძველი ქალაქის რეაბილიტაციის და განვითარების ფონდიდან“ რიყის ტერიტორიის უკან გამოსყიდვის მიზნით  შპს „ახალ რიყეს“ გადაერიცხა 17 000 000 აშშ დოლარი. ამის შემდეგ შპს „ახალი რიყეს” ხელმძღვანელობასა და ჯოზეფ ქეის კომპანიას „lakebrow limited”-ს  შორის გაფორმდა ფიქციური ხელშეკრულება, რომლის საფუძველზეც შპს „ახალი რიყეს“ საბანკო ანგარიშიდან ჯოზეფ კეის კომპანიას ჩაერიცხა 8 811 189 აშშ დოლარი, ანუ ტელეკომპანია “იმედი“ მისაკუთრებული იქნა ბიუჯეტის კუთვნილი თანხების მითვისებისა და შემდგომი გათეთრების გზით“.

2012 წლის 1 ოქტომბრის საპარლამენტო არჩევნებიდან დაახლოებით ორ კვირაში ტელეკომპანია „იმედი“, რომელსაც პრეზიდენტ სააკაშვილის დიდი ხნის მოკავშირე და ყოფილი მთავრობის წევრი გიორგი არველაძე მართავდა, გარდაცვლილი ბიზნესმენის ბადრი პატარკაციშვილის ოჯახს გადაეცა. ამჟამად, ტელეკომპანიას მფლობელია პატარკაციშვილის ქვრივი ინა გუდავაძე.

მეორე ეპიზოდთან დაკავშირებით, გამოძიება აცხადებს, რომ გიგი უგულავა იყო ორგანიზატორი საბიუჯეტო თანხების გამოყენებით ნაციონალური მოძრაობის "თვალთმაქცური დაფინანსების".

„კერძოდ, მისი დავალებით 2009 წლის 31 დეკემბერს, შპს „თბილსერვის ჯგუფ“-ში „ერთიანი ნაციონალური მოძრაობის“ აქტივისტებისათვის ფულის დარიგების მიზნით სპეციალურად შეიქმნა „საზოგადოებასთან ურთიერთობის განყოფილება,“  სადაც ფიქციურად გაფორმდა 764 აქტივისტი - ე.წ. პარტიული კოორდინატორი. უმეტესობას ამ სამსახურში არც ერთი დღე არ უმუშავია და ეწეოდა პარტიულ საქმიანობას,  თუმცა დედაქალაქის  ბიუჯეტისთვის განკუთვნილი ასიგნებებიდან  მათ ხელფასის სახით  4 130 728  ლარი დაერიცხათ“, - აცხადებს საგამოძიებო სამსახური.

დედაქალაქის მერმა არაერთხელ განაცხადა, რომ აქტივისტების დასაქმება მისი დავალებით მოხდა. „ამიტომ მე ვიღებ სრულად პასუხისმგებლობას ამასთან დაკავშირებით“, - განუცხადა უგულავამ ჟურნალისტებს 22 თებერვალს, ვიდრე საგამოძიებო სამსახური მის შესახებ განცხადებას გაავრცელებდა. თუმცა მან ასევე აღნიშნა, რომ მის ამ ქმედებაში ვერ ხედავს დანაშაულს. 

იანვრის ბოლოს, როდესაც ცნობილი გახდა, რომ ხელისუფლება სავარაუდო ფიქტიური სამუშაოების შექმნის საქმეს იძიებდა, უგულავამ განაცხადა, რომ თბილისის მერიამ მაშინ 700 ადამიანზე მეტი დაიქირავა, რათა თბილისელებთან ნაგვის ბუნკერების საცხოვრებელი კორპუსებიდან გარეთ გატანის საჭიროებაზე ესაუბრათ. 
„დიახ, ეს ხალხი მუშაობდა, მათ კონკრეტული ფუნქცია ჰქონდათ იმიტომ, რომ ამ პერიოდში ხდებოდა ძალიან მტკივნეული პროცესი ქალაქში. ეს იყო ბუნკერების გაუქმება, რამაც უამრავ თბილისელს შვება მოუტანა. ამ საკითხს სჭირდებოდა კომუნიკაცია; ამ საკითხს სჭირდებოდა უამრავი ადამიანი, რომელიც დადიოდა და კარდაკარ უხსნიდა ამ საჭიროებას; და სწორედ ამ მიზნით იყო აყვანილი ეს ხალხი“, – განაცხადა უგულავამ.

 

ამავე თემაზე
უახლესი ამბები
19 აპრ.'18 18:12
საპარლამენტო უმრავლესობის შეხვედრა შიდაპარტიულ დავაზე გადაიდო
მმართველი პარტიის დეპუტატების შეხვედრას, სავარაუდოდ, 21 აპრილს გაიმართება. 
19 აპრ.'18 15:58
საქართველოს საგარეო ვაჭრობა 2018 წლის პირველ კვარტალში
2018 წლის იანვარ-მარტში საქართველოს საგარეო სავაჭრო ბრუნვა წინა წლის შესაბამის პერიოდთან შედარებით 23.3%-ით გაიზარდა და 2.8 მილიარდი აშშ დოლარი შეადგინა.    
19 აპრ.'18 13:02
პრემიერ-მინისტრმა ახალი საპარლამენტო მდივანი დანიშნა
ნათია მიქელაძემ შალვა თადუმაძე შეცვალა, რომელიც მთავრობის ადმინისტრაციის ახალ უფროსად დაინიშნა.
18 აპრ.'18 19:32
მმართველი პარტიის დეპუტატები შიდაპარტიული დაპირისპირების თაობაზე შეიკრიბებიან
ქართული ოცნების საპარლამენტო უმრავლესობა შეხვედრას ხვალ საღამოს გამართავს.
18 აპრ.'18 19:07
ოკუპირებული ცხინვალის მახლობლად დაკავებული საქართველოს მოქალაქე თავისუფალია
სოფელ ფლავისმანის მკვიდრი თამაზ ილურიძე, სავარაუდოდ, ცხინვალის რეგიონში განთავსებულმა რუსეთის ოფიცრებმა გუშინ დააკავეს.
18 აპრ.'18 16:09
პრეზიდენტის შეწყალების პრაქტიკის გარშემო პოლიტიკური დავა გრძელდება
პრეზიდენტი მარგველაშვილი მმართველ და ოპოზიციურ პარტიებს მის წინააღმდეგ შეთანხმებული კამპანიის აგორებაში ადანაშაულებს.
18 აპრ.'18 14:06
აქტივისტები საქართველოს მოქალაქის დაკავებას აპროტესტებენ
სოფელ ფლავისმანის მკვიდრი თამაზ ილურიძე, გავრცელებული ინფორმაციით, რუსმა ოფიცრებმა დააკავეს.
18 აპრ.'18 12:04
მარგველაშვილი შეწყალების პრაქტიკის შესახებ კრიტიკას პასუხობს
პრეზიდენტი დროებით წყვეტს ძალადობრივი დანაშაულისთვის მსჯავრდებული პატიმრების შეწყალებას.
17 აპრ.'18 16:12
ადვოკატის თქმით, ტატუნაშვილის ცხედარს შინაგანი ორგანოები აკლდა
პროკურატურამ არჩილ ტატუნაშვილის მამას და ადვოკატს გამოძიების მსვლელობის შესახებ ინფორმაცია მიაწოდა.
16 აპრ.'18 18:46
შუალედური საპარლამენტო არჩევნებისთვის ცხრა კანდიდატი დარეგისტრირდა
არჩევნები ვანის და ხონის მაჟორიტარული ოლქის 60 საარჩევნო უბანზე ჩატარდება, სადაც 48 054 ამომრჩეველია რეგისტრირებული.

სივილ ჯორჯიას შესახებ
Civil.Ge © 2001-2018, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
76