Civil.ge-ს შესახებ
Eng | ქარ | Рус
ბოლო განახლება: 19:57 - 25 სექ.'17
RSS
Mobile
Twitter
Facebook
მთავრობამ ადგილობრივი თვითმმართველობის რეფორმირების გეგმა წარმოადგინა
სივილ ჯორჯია, თბილისი / 22 თებ.'13 / 20:44

საქართველოს მთავრობამ 21 თებერვალს დაამტკიცა კონცეფცია, რომელიც ადგილობრივი თვითმმართველობის სისტემასთან დაკავშირებით მთელ რიგ რეფორმებს ითვალისწინებს, რაც დოკუმენტის თანახმად, მიზნად ისახავს ადგილობრივი თვითმმართველობის უფლებებით აღჭურვას და გადაწყვეტილების მიღების პროცესში ადგილობრივის მოსახლეობის მეტ ჩართულობას.

რეფორმების გეგმის თანახმად, რომელიც რეგიონალური განვითარების და ინფრასტრუქტურის სამინისტრომ შეიმუშავა, ახალი შემოთავაზებული სისტემის უმეტესი ასპექტები, რომელიც სხვა საკითხებთან ერთად ასევე ითვალისწინებს ქალაქების მერების პოსტის არჩევითობას, 2014 წლის გაზაფხულზე ადგილობრივ არჩევნებთან ერთად შევა ძალაში. 

სულ საქართველოში ცხრა ტერიტორიულ–ადმინისტრაციული ერთეული (მხარე) ან რეგიონია: გურია; იმერეთი; კახეთი; მცხეთა–მთიანეთი; რაჭა-ლეჩხუმი და ქვემო სვანეთი; სამეგრელო და ზემო სვანეთი; სამცხე–ჯავახეთი; ქვემო ქართლი; შიდა ქართლი (ადმინისტრაციულად სეპარატისტული სამხრეთ ოსეთი შიდა ქართლის რეგიონის ნაწილია). ამ რეგიონების გუბერნატორებს პრეზიდენტი ნიშნავს.

აჭარას ავტონომიური რესპუბლიკის სტატუსით უფრო მაღალი დონის თვითმმართველობა აქვს, ვიდრე სხვა რეგიონებს; საქართველოს კანონმდებლობით,  აფხაზეთიც ავტონომიური რესპუბლიკაა.

რეგიონები (მათ შორის აჭარა) მუნიციპალიტეტებად არის დაყოფილი, რომლებიც სოფლებს და ქალაქებს აერთიანებს. ამჟამად, სულ 69 მუნიციპალიტეტია და თითოეულს პირდაპირი წესით არჩეული საკრებულო ჰყავს;  აღმასრულებელ შტოს ამ მუნიციპალიტეტების დონეზე გამგებლები უძღვებიან, რომელთაც საკრებულოები ირჩევენ. გამგებლები სოფლის რწმუნებულებს ნიშნავენ შესაბამისი მუნიციპალიტეტების შემავალ სასოფლო დასახლებებში.

სულ ხუთი „თვითმმართველი ქალაქია“ – თბილისი, ქუთაისი, ბათუმი, რუსთავი და ფოთი. ამ ქალაქების მერებს, გარდა თბილისისა, ადგილობრივი საკრებულოები ირჩევენ. თბილისი ერთადერთი ქალაქია საქართველოში, სადაც მერს პირდაპირი წესით ამომრჩევლები ირჩევენ.

მთავრობის მიერ შემოთავაზებული რეფორმირების გეგმის თანახმად, სასოფლო დასახლებაში იფუნქციონირებს „პირდაპირი დემოკრატიის ფორმა“ - სოფლის კრება, სადაც  აირჩევა კრების თავჯდომარე და წარმომადგენელთა საბჭოები. მართალია, ამ თვითმმართველ ორგანოებს არ ექნებათ საკუთარი დამოუკიდებელი ბიუჯეტები, მაგრამ მათ ექნებათ "სოფლის მხარდაჭერის პროგრამის" ფარგლებში და სხვა პროგრამებით სოფლებში განსახორციელებელი პრიორიტეტული ინფრასტრუქტურული პროექტების შერჩევის და შემდგომი მონიტორინგის ფუნქცია. სოფლებს ასევე შეეძლებათ „საჯარო სამართლის იურიდიული პირის“ სტატუსი მიიღონ, რაც საშუალებას მისცემთ მათ დაფინანსება მიიღონ მუნიციპალური ადგილობრივი თვითმმართველობიდან ადგილზე კონკრეტული პროექტების განსახორციელებლად.  მთავრობის გეგმის თანახმად, შესაბამისი საკანონმდებლო ცვლილებები 2013 წელს განხორციელდება.

კონცეფციის თანახმად,  დასახლებები ან დასახლებათა ერთობლიობები ჩამოყალიბდება როგორც „თვითმმართველი ერთეულები - თვითმმართველი ქალაქები და თვითმმართველი თემები“. ამ მიზნით, 2014 წლის ადგილობრივ არჩევნებამდე კანონით დადგინდება მუნიციპალური თვითმმართველობის ტერიტორიული ორგანიზების დემოგრაფიული, გეოგრაფიული, ინფრასტრუქტურული, ეკონომიკური, სოციალური და კულტურული ჩარჩო-კრიტერიუმები და პრინციპები. 

კონცეფციის თანახმად, „თვითმმართველი ერთეულების ფორმირების პროცესის დასრულების და შესაბამისი ტექნიკური (გეოინფორმაციული) სამუშაოების დასრულების შემდგომ, კანონით განსაზღვრული წესით დამტკიცდება თვითმმართველი ერთეულების ნუსხა და საზღვრები, რომლებშიც უნდა გაიმართოს 2014 წლის ადგილობრივი არჩევნები“.

ამ თვითმმართველი ერთეულების ადგილობრივი საკანონმდებლო ორგანოები საკრებულოები - ორი წლის ვადით აირჩევა; თვითმმართველი ერთეულის აღმასრულებელ ორგანოთა ხელმძღვანელები (გამგებელი სოფელში/თემში და მერი - ქალაქში) არჩეულ იქნებიან პირდაპირი წესით. ადგილობრივ თვითმმართველობას ამ დონეზე საკუთარი ბიუჯეტი ექნება.

რეფორმის შედეგად, მნიშვნელოვნად გაიზრდება თვითმმართველი ორგანოების რაოდენობა მუნიციპალიტეტების დონეზე არსებული 69–დან დაახლოებით 200–მდე, თუმცა ზუსტი რაოდენობა მოგვიანებით გახდება ცნობილი ახალი საზღვრების დადგენის პროცესში, როგორც ამის თაობაზე რეგიონალური განვითარების და ინფრასტრუქტურის მინისტრმა დავით ნარმანიამ განაცხადა.

სამხარეო წარმომადგენლობითი ორგანოს ფორმირება მოხდება მხარეში შემავალი მუნიციპალური თვითმმართველი ერთეულების საკრებულოების წარმომადგენლებისგან. გათვალისწინებული იქნება სამხარეო საბჭოში ოპოზიციური სუბიექტების და უპარტიო წარმომადგენლების წარმომადგენლობის ასახვა.

მხარის აღმასრულებელი ხელისუფლების ხელმძღვანელი იქნება მხარის ადმინისტრაციის ხელმძღვანელი. ადმინისტრაციის ხელმძღვანელის სამ კანდიდატს შეარჩევს სამხარეო საბჭო და წარუდგენს საქართველოს მთავრობას, რომელთაგანაც საქართველოს მთავრობა შეარჩევს და დაამტკიცებს ადმინისტრაციის ხელმძღვანელს.

რეგიონალური განვითარების და ინფრასტრუქტურის მინისტრი დავით ნარმანია აცხადებს, რომ მთავრობას სურს, რომ რეფორმა ეტაპობრივად განახორციელოს და ამ მიზნით, მან გადაწყვიტა, რომ გუბერნატორის პოსტი პირდაპირ არჩევითი არ გახადოს ამ ეტაპზე. თუმცა, მან ასევე განაცხადა, რომ კონცეფცია ღიაა განხილვისთვის, მათ შორის ამ კონკრეტულ საკითხზე.

კონცეფციის თანახმად, დედაქალაქს ექნება „განსაკუთრებული სტატუსი“, რომელშიც კონცენტრირებული იქნება როგორც მუნიციპალური თვითმმართველობის, ასევე სამხარეო თვითმმართველობის ფუნქციები. დედაქალაქი - თბილისი დაიყოფა მუნიციპალიტეტებად/უბნებად. თბილისის თვითმმართველობის აღმასრულებელი ორგანოები იქნებიან თბილისის მერია და მუნიციპალიტეტების (უბნების) გამგეობები. მერი აირჩევა პირდაპირი, საყოველთაო, თანასწორი და ფარული კენჭისყრით, საკრებულოს უფლებამოსილების ვადით.

კონცეფციის თანახმად, ყველა მუნიციპალურ თვითმმართველ ერთეულს და მხარეს ექნება „საკუთარი დამოუკიდებელი ბიუჯეტი“.

საგადასახადო შემოსავლების გამიჯვნის მარეგულირებელი საკანონმდებლო ნორმების ამოქმედება  ეტაპობრივად 2015-2017 წლებში მოხდება.

ქონების გადასახადი იქნება ადგილობრივი ტიპის და მიემართება მუნიციპალურ ბიუჯეტებში, მაგრამ საშემოსავლო გადასახადი იქნება ზიარი ტიპის და წილობრივად განაწილდება მუნიციპალურ და სამხარეო ბიუჯეტებს შორის (მუნიციპალიტეტის უმეტესი წილით). მოგების გადასახადი იქნება ზიარი სამხარეო ბიუჯეტსა და სახელმწიფო ბიუჯეტს შორის.  ადგილობრივი ბიუჯეტები ცენტრალური ბიუჯეტიდან ტრანსფერებითაც შეივსება.

გეგმა ასევე ითვალისწინებს 2013 წელს სპეციალური კანონის მიღებას "მაღალმთიანი და განსაკუთრებული დასახლებების" შესახებ. კანონი შეეხება მაღალმთიან დასახლებებს, დეპრესიულ, ცენტრალური მაგისტრალებიდან დაშორებით მყოფ და ინფრასტრუქტურულად მოწყვეტილ (ძნელად მისადგომ) დასახლებებს, ასევე დასახლებებს, რომელთა შენარჩუნებას და მოსახლეობის მიგრაციის შეჩერებას აქვს განსაკუთრებული სახელმწიფო მნიშვნელობა. ასეთი დასახლებებისთვის კანონით განისაზღვრება სპეციალური შეღავათები და ფინანსური მხარდაჭერის პროგრამები.

უახლესი ამბები
25 სექ.'17 19:57
პრეზიდენტი საკონსტიტუციო ცვლილებების მესამე მოსმენით მიღების წინააღმდეგ გამოდის
რიგგარეშე სხდომის მოწვევაზე პრეზიდენტის უარის მიუხედავად, პარლამენტი საკონსტიტუციო ცვლილებების საბოლოო მიღებისათვის 26 სექტემბერს შეიკრიბება.
25 სექ.'17 17:27
არჩევნები 2017: ყოველკვირეული მიმოხილვა №3
მიმოხილვის მესამე გამოცემაში 18-24 სექტემბრის კვირაში მომხდარ მნიშვნელოვან მოვლენებს გაგაცნობთ.
25 სექ.'17 15:42
ბალტიისპირეთის საგარეო საქმეთა სამინისტროები ევროკავშირში წევრობის პერსპექტივაზე
Civil.ge-მ აღმოსავლეთ პარტნიორობის მომავალ სამიტთან დაკავშირებით ევროკავშირის წევრი სახელმწიფოების საგარეო უწყებებს მიმართა.
25 სექ.'17 14:31
ვენეციის კომისია საქართველოს კონსტიტუციის პროექტის შესახებ
ვენეციის კომისიის თქმით, პროპორციულ სისტემაზე გადასვლის გადავადება სამწუხაროა, ხოლო ბონუსის სისტემა უნდა გაუქმდეს.
22 სექ.'17 23:53
საქართველოს ხელისუფლება ოკუპირებულ სამხრეთ ოსეთში ქართველთა სახლების განადგურებას ეხმაურება
სოფელ ერედვში მიმდინარე სამუშაოებს საქართველოს ხელისუფლება „გენოციდის გაგრძელებად“ აფასებს. 
22 სექ.'17 22:53
მთავრობამ აშშ-ში ლობირებისთვის თითქმის მილიონი დახარჯა
სულ ბოლოს მთავრობამ კომპანია StrateVarious LLC-სთან მოაწერა კონტრაქტს ხელი.
22 სექ.'17 17:17
კვირიკაშვილი: საქართველო იზრდება, ის არის სიცოცხლით სავსე და მტკიცე გამოწვევებთან ბრძოლაში
საქართველოს პრემიერ-მინისტრი გაეროს გენერალურ ასამბლეაზე სიტყვით გამოვიდა.
22 სექ.'17 17:00
ადგილობრივ არჩევნებზე 23 პარტია, 5 საარჩევნო ბლოკი და 200-ზე მეტი საინიციატივო ჯგუფი დარეგისტრირდა
რამდენიმე დღეში საარჩევნო ადმინისტრაცია სარეგისტრაციო პროცედურებს დაასრულებს და კანდიდატთა საბოლოო სიებს გამოაქვეყნებს.
22 სექ.'17 12:00
პრემიერ-მინისტრის გამოსვლა გაეროს გენერალურ ასამბლეაზე
გიორგი კვირიკაშვილი ნიუ-იორკში საქართველოს დელეგაციას ხელმძღვანელობს. 
21 სექ.'17 18:36
რუსეთი სოხუმში საბაჟო პუნქტს გახსნის
პუნქტი მთელ აფხაზეთს მოიცავს, რუსეთის კანონმდებლობით იმუშავებს, მისი თანამშრომლები კი იმუნიტეტით ისარგებლებენ.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
93