Civil.ge-ს შესახებ
Eng | ქარ | Рус
ბოლო განახლება: 12:34 - 15 დეკ.'17
RSS
Mobile
Twitter
Facebook
სააკაშვილი და ივანიშვილი ევროკავშირის აღმოსავლეთ პარტნიორობის სამიტისგან თბილისის მოლოდინებზე საუბრობენ
სივილ ჯორჯია, თბილისი / 13 თებ.'13 / 12:36

პრეზიდენტმა სააკაშვილმა და პრემიერ–მინისტრმა ბიძინა ივანიშვილმა თბილისში 12 თებერვალს ევროკავშირის წარმომადგენლებთან ცალ–ცალკე გამართული შეხვედრების შემდეგ სურვილი გამოთქვეს, რომ ნოემბერში აღმოსავლეთ პარტნიორობის ვილნიუსის სამიტზე მიიღონ დეკლარაცია ევროკავშირში წევრობის პერსპექტივის შესახებ.

„ახალი მთავრობა ყველაფერს აკეთებს იმისათვის, რომ [ევროპული ინტეგრაციის] ტემპები იყოს მაქსიმალურად დაჩქარებული“, – განაცხადა პრემიერ–მინისტრმა ევროპული სამეზობლო პოლიტიკისა და გაფართოების საკითხებში ევროკომისარ შტეფან ფულესთან შეხვედრის შემდეგ.

„ჩვენ გამოვხატეთ ჩვენი მიზანი, რომ მაქსიმუმია ჩვენი ის, რომ ვილნიუსის სამიტისთვის ჩვენ მოვახერხოთ პარაფირება ასოცირების შეთანხმების შესახებ და ძალიან კარგი იქნება, თუ ასეთი ჩანაწერიც გაჩნდება [დეკლარაციაში], რომ ჩვენ გვაქვს ევროპული პერსპექტივა, რაც  მაქსიმუმია დღევანდელისთვის, რასაც ჩვენ შეიძლება მივაღწიოთ ვილნიუსის სამიტამდე“, – განაცხადა ივანიშვილმა.

პრემიერ–მინისტრთან შეხვედრამდე, ევროკომისარი პრეზიდენტ სააკაშვილს შეხვდა, რომელმაც მოლაპარაკებების შემდეგ გამართულ ერთობლივ პრესკონფერენციაზე თავის გახსნით სიტყვაში ასევე წამოწია ეს საკითხი.

„წელს არის ძალიან მნიშვნელოვანი სამიტი ვილნიუსში, სადაც საქართველოს – მე ყოველთვის იმედი მქონდა, რომ ჩვენ მივდიოდით აქამდე – აქვს პერსპექტივა და ჰქონდა პერსპექტივა, რომ  მიეღო ევროკავშირის პერსპექტივის განცხადება; ეს იმას ნიშნავს, რომ ჩვენ დავსახელებულიყავით, როგორც ევროკავშირის წევრობის შესაძლო კანდიდატი მომავალში“, – განაცხადა პრეზიდენტმა სააკაშვილმა.

„ეს იქნება ნამდვილი გეოპოლიტიკური გარღვევა საქართველოსთვის და ეს არის ისტორიული შანსი ჩვენი ქვეყნისთვის“, – დასძინა მან.

თუმცა, ევროკომისარმა ფულემ აღნიშნა პრეზიდენტ სააკაშვილთან შეხვედრის შემდეგ გაკეთებულ განცხადებაში, რომ „ყველაზე პოზიტიური სიახლე“, რასაც საქართველო შეიძლება ელოდეს ვილნიუსის სამიტისგან, იქნება ასოცირების შესახებ შეთანხმებაზე მოლაპარაკებების დასრულება, რომელიც ასევე მოიცავს ევროკავშირთან ღრმა და ყოვლისმომცველი თავისუფალი ვაჭრობის შეთანხმებას.

„ეს იქნება სამიტი, რომელიც, მე ვიმედოვნებ, ევროპული პერსპექტივისკენ წაგვიყვანს, მაგრამ არა რაიმე პოლიტიკური დეკლარაციის საფუძველზე... არამედ რეფორმების პროცესზე დაყრდნობით“, – განაცხადა მან.

ფულემ იმედი გამოთქვა, რომ ვილნიუსის სამიტი მნიშვნელოვანი იქნება აღმოსავლეთ პარტნიორობის სამიტის შემდგომი მიმართულების ფორმირებისთვის.

თუმცა ევროკავშირის შესახებ ხელშეკრულების იმ მუხლზე მინიშნებით, რომელიც გაწევრიანების სამართლებრივ საფუძველს წარმოადგენს, მან ასევე აღნიშნა: „არ მგონია, რომ ჯერ იმ ეტაპზე ვიყოთ, როდესაც 49–ე მუხლზე ვისაუბრებთ“.

„მოლოდინების მართვა აღმოსავლეთ პარტნიორობის დღევანდელი არაფორმალური დიალოგის მნიშვნელოვანი ელემენტი იყო“, – განაცხადა ფულემ.

ფულეს მხედველობაში ჰქონდა არაფორმალური მინისტერიალი, რომელსაც თბილისმა უმასპინძლა და რომელშიც აღმოსავლეთ პარტნიორობის ექვსი წევრი სახელმწიფოს – სომხეთის, აზერბაიჯანის, ბელარუსის, საქართველოს, მოლდოვას და უკრაინის საგარეო საქმეთა მინისტრებმა და მაღალი რანგის დიპლომატებმა მიიღეს მონაწილეობა.

თბილისში ასევე იმყოფება ევროპის საგარეო მოქმედებათა სამსახურის გენერალური მდივნის მოადგილე ჰელგა შმიდტი, რომელიც აღმოსავლეთ პარტნიორობის ორდღიან არაფორმალურ სამიტში მონაწილეობს. 13 თებერვალს იმართება მინისტერიალის დარგობრივი შეხვედრა, რომელიც ტრანსპორტის საკითხებს ეძღვნება. ევროკავშირს ამ შეხვედრაზე ევროკომისიის ვიცე–პრეზიდენტი სიიმ კალასი  წარმოადგენს.

„საქართველო თანმიმდევრობის და სიმტკიცის მაგალითს წარმოადგენს შეთანხმებული რეფორმების განხორციელების საქმეში და დარწმუნებული ვარ, რომ ისინი [საქართველოს ხელისუფლება] განაგრძობენ ამ კურსს, თანაარსებობის გამოწვევის მიუხედავად“, – განაცხადა ფულემ.

პრემიერ–მინისტრმა ევროკომისართან შეხვედრის შემდეგ განაცხადა, რომ ევროკავშირი ყურადღებით აკვირდება საქართველოს ახალი მთავრობის და პრეზიდენტის თანაარსებობას.

„იყო თხოვნა ბატონი ფულეს მხრიდან, რომ მოვახერხოთ, რომ ეს ურთიერთობები გაუმჯობესდეს“, – განაცხადა ივანიშვილმა.

„კოჰაბიტაცია არ არის ყველაზე საყვარელი სიტყვა სადმე მსოფლიოში“, – განაცხადა ფულემ, „მაგრამ ეს არსებული რეალობაა და პოლიტიკოსებზეა დამოკიდებული კოჰაბიტაციის ფარგლებში საუკეთესოდ იმოქმედონ“.

„ვიმედოვნებთ, რომ პოლიტიკოსები საქართველოში ისეთ კომუნიკაციას დაამყარებენ  საქართველოს ყველაზე მნიშვნელოვან ინტერესებთან დაკავშირებით – და მიმაჩნია, რომ მათ შორის ევროინტეგრაციის საკითხიც არის – რომ კოჰაბიტაცია არ გახდება გამართულებელი ფაქტორი დღევანდელ და ვილნიუსის სამიტამდე არსებულ პერიოდში. ჩვენ ყველას გვინდა საქართველო ვიხილოთ, როგორც წარმატებული მაგალითი რეგიონისთვის“, – განაცხადა ევროკომისარმა.

ფულესთან შეხვედრის შემდეგ პრეზიდენტმა სააკაშვილმა კიდევ ერთხელ გაიმეორა ნაციონალური მოძრაობის მოწოდებები, რომ საქართველოს პროდასავლური საგარეო პოლიტიკური კურსი კონსტიტუციურად გარანტირებული გახდეს და გამოთქვა მზადყოფნა ამ და სხვა საკითხებზე მჭიდროდ იმუშაოს მთავრობასთან.

როდესაც სამშაბათს ცალკე გამართულ პრესკონფერენციაზე შტეფან ფულეს კითხეს, თუ რას ფიქრობს ის ევროკავშირსა და ნატოში საქართველოს მისწრაფების შესახებ კონსტიტუციაში ცალკე დებულების შეტანაზე, მან უპასუხა: „პოლიტიკოსებზე, დაინტერესებულ პირებზე, ხალხზეა დამოკიდებული გადაწყვიტონ ეს თავიანთ ქვეყანაში. მე მაინც მიმაჩნია რომ უფრო მნიშვნელოვანია პოლიტიკის განხორციელებისას კონკრეტული შედეგების მიღწევა; მე ვიცი რამდენიმე ქვეყანა, სადაც კონსტიტუციებში მიზნები ნათლადაა განსაზღვრული, მაგრამ რეალობა საკმარისად არ ასახავს იმ მისწრაფებებს, რომლებიც მათ კონსტიტუციებშია გამოთქმული“.

უახლესი ამბები
15 დეკ.'17 12:34
ამერიკელი სენატორი საქართველოსთვის ჯაველინის სისტემის მიყიდვას ეწინააღმდეგება
სენატორმა რენდ პოლმა რეზოლუცია წარადგინა, სადაც შემოთავაზებული მიყიდვის აკრძალვას ითხოვს.
14 დეკ.'17 19:26
ჟენევის საერთაშორისო დისკუსიების 42-ე რაუნდი
მხარეთა შორის უთანხმოებები 12-13 დეკემბრის რაუნდის დროსაც გაგრძელდა.
14 დეკ.'17 15:16
სამხედრო ძალების რაოდენობა მომავალი წლისთვის კვლავ 37 ათასით განისაზღვრა
საქართველოს შეიარაღებული ძალების ზღვრული მაქსიმუმი 37 ათასს 2008 წლის ივლისის შემდეგ შეადგენს.
14 დეკ.'17 13:41
პარლამენტმა ახალ კონსტიტუციაში ინიცირებული ცვლილებები პირველი მოსმენით მიიღო
კანონპროექტის საბოლოო მოსმენით მიღება საგაზაფხულო სესიაზე იგეგმება.
14 დეკ.'17 10:45
2018 წლის ბიუჯეტი დამტკიცებულია
ოპოზიციამ მხარი არ დაუჭირა მომავალი წლის ბიუჯეტს, რომელიც 4.5%-იან ეკონომიკურ ზრდაზეა გათვლილი.
13 დეკ.'17 18:37
რუსეთი სოხუმთან მოქალაქეობის შესახებ შეთანხმებებს მოაწერს ხელს
მოსკოვი ორ შეთანხმებას ამზადებს ორმაგი მოქალაქეობის და მოქალაქეობის მიღების გამარტივებული პროცედურის შესახებ.
13 დეკ.'17 16:06
ეროვნულმა ბანკმა მონეტარული პოლიტიკის განაკვეთი 7.25%-მდე გაზარდა
მონეტარული პოლიტიკის კომიტეტის მომდევნო სხდომა 2018 წლის 31 იანვარს გაიმართება.
13 დეკ.'17 12:18
საქართველოს საგარეო ვაჭრობა 2017 წლის იანვარ-ნოემბერში
უარყოფითმა სავაჭრო ბალანსმა 4.68 მილიარდი აშშ დოლარი შეადგინა.
12 დეკ.'17 18:51
დეპუტატები ქალთა სავალდებულო კვოტირების ინიციატივას მხარს უჭერენ
დეპუტატ ეკა ბესელიას თქმით, საკანონმდებლო ინიციატივის მიღება 2018 წლის ადრეულ გაზაფხულზე იგეგმება. 
12 დეკ.'17 16:29
ჟენევასა და ბერლინში საქართველოს დიპლომატიურ მისიებს ახალი ელჩები უხელმძღვანელებენ
ვიქტორ დოლიძე და ელგუჯა ხოკრიშვილი უფლებამოსილების განხორციელებას 2018 წლის იანვრიდან შეუდგებიან.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
119