Civil.ge-ს შესახებ
Eng | ქარ | Рус
ბოლო განახლება: 18:40 - 23 მაი.'17
RSS
Mobile
Twitter
Facebook
ქართული ოცნების დეპუტატები კოლეგებს ნაციონალური მოძრაობიდან დებატებში იწვევენ
სივილ ჯორჯია, თბილისი / 4 თებ.'13 / 14:05

ქართული ოცნების დეპუტატები კოლეგებს ნაციონალური მოძრაობიდან საჯარო სატელევიზიო დებატებში იწვევენ, რათა მათ ღიად დააფიქსირონ პოზიცია უჭერენ თუ არა მხარს პრეზიდენტის უფლებამოსილებასთან დაკავშირებით დაგეგმილ საკონსტიტუციო ცვლილებებს.

ეს ინიციატივა საპარლამენტო უმრავლესობაში შემავალმა ფრაქციებმა 4 თებერვალს იმ საკონსტიტუციო ცვლილებების საპარლამენტო განხილვის მოახლოებასთან ერთად გააჟღერეს, რომლითაც პრეზიდენტს ყველა საკონსტიტუციო უფლებამოსილება უნარჩუნდება, გარდა ერთისა, რომელიც მას მთავრობის გამოცვლის შესაძლებლობას იმ შემთხვევაშიც კი აძლევს, თუ პარლამენტი უარს იტყვის მის მიერ შეთავაზებული ახალი მთავრობის დამტკიცებაზე.

„წლების განმავლობაში სააკაშვილის ზურგს უკან მიმალულ ადამიანებს, რომლებიც პერსონალურად არასოდეს არაფერზე აგებდნენ პასუხს, მოუწევთ საკუთარი აზრის მკაფიოდ დაფიქსირება კონკრეტულ საკითხზე - უნდა ჩამოერთვას თუ არა პრეზიდენტს ხალხის და პარლამენტის თანხმობის გარეშე მთავრობის შეცვლის უფლება“, - ნათქვამია „ქართული ოცნების“ ოთხი საპარლამენტო ფრაქციის ერთობლივ განცხადებაში.

საპარლამენტო უმრავლესობა აცხადებს, რომ სატელევიზიო დებატების ფორმატში კოლეგებმა ნაციონალური მოძრაობიდან დაგეგმილ საკონსტიტუციო ცვლილებებთან დაკავშირებით უნდა „განაცხადონ - „კი“ თუ „არა“.

„ამ პასუხზე იქნება დამოკიდებული ჩვენი დამოკიდებულება თითოეული მათგანისადმი - ვინც იტყვის „კი“, მასთან ჩვენ ვხედავთ თანამშრომლობის თუ ოპონირების აზრს და შესაძლებლობას სხვა საკითხებზეც; ვინც იტყვის „არა“, მის მოსმენაზე და მასთან დებატებზე ჩვენ დროს ვერ დავკარგავთ ვერც ნებისმიერ სხვა საკითხზე“, - ნათქვამია განცხადებაში.

განცხადების გავრცელების გეგმები პრემიერ-მინისტრმა ბიძინა ივანიშვილმა 2 თებერვალს დააანონსა მას შემდეგ, რაც დახურული შეხვედრა გამართა დეპუტატებთან საპარლამენტო უმრავლესობიდან.

უმრავლესობას არ აქვს საკმარისი 100 ხმა, რათა დამოუკიდებლად, ნაციონალური მოძრაობის დეპუტატების მხარდაჭერის გარეშე შეიტანოს შესწორებები კონსტიტუციაში, რომელიც, ქართული ოცნების თქმით, კრიზისის აცილებას ისახავს მიზნად. ამ ცვლილებების პროექტის საერთო-სახალხო განხილვაზე გატანას პარლამენტში გამართულ კენჭისყრაზე 108 დეპუტატმა დაუჭირა მხარი, მათ შორის ნაციონალური მოძრაობის წევრებმაც. ისინი თავდაპირველად რეგიონებში პროექტის სახალხო განხილვის ფორმატშიც იღებდნენ მონაწილეობას, თუმცა ბოლოსკენ ამ პროცესში მონაწილეობა შეწყვიტეს მათ მიმართ გამოვლენილი კრიტიკული დამოკიდებულების ფონზე. 

ნაციონალური მოძრაობა და მისი ლიდერი, პრეზიდენტი სააკაშვილი ამ ცვლილებების წინააღმდეგ გამოდიან, ისევე როგორც ეწინააღმდეგებიან ცვლილებათა მეორე პროექტს, რომელიც პარლამენტის ადგილმდებარეობას ეხება. პრეზიდენტმა სააკაშვილმა და ზოგიერთმა დეპუტატმა ნაციონალური მოძრაობიდან არაერთი განცხადება გააკეთეს იმის თაობაზე, რომ ბიძინა ივანიშვილის კოალიცია საკმარისი ხმების მოსაგროვებლად მისი პარტიის წევრების გადაბირებას ცდილობს, მათ შორის შანტაჟის გზით.

ქართული ოცნება უარყოფს რაიმე ზეწოლას ოპონენტებზე და აცხადებს, რომ არ გამორიცხავს მათი ინიციატივის მხარდაჭერას ნაციონალური მოძრაობის ცალკეული წევრების მიერ,  „მიუხედავად იმისა, თუ რა იქნება მიხეილ სააკაშვილის პოზიცია“.

„არჩევანი მათზეა“, - ნათქვამია განცხადებაში, „იმ შემთხვევაშიც კი, თუ სააკაშვილმა სწორი ნაბიჯის გადადგმის საშუალება არ მისცა არც მის გუნდს და არც მის ცალკეულ წარმომადგენლებს და კონსტიტუციურმა ცვლილებებმა ხმათა საჭირო რაოდენობა ვერ მიიღო, კოალიცია „ქართული ოცნების“ პოლიტიკური მიზანი მაინც მიღწეული იქნება. ამ შემთხვევაში დემოკრატიული სამყარო საბოლოოდ დარწმუნდება, რომ მიხეილ სააკაშვილის სახით ჩვენ საქმე გვაქვს ძალაუფლებაზე შეყვარებულ თავგზააბნეულ დიქტატორთან, ხოლო ნაციონალური მოძრაობის სახით - საკუთარი პოლიტიკური თვითგანადგურების გზაზე მდგარ, ერთი კაცის ახირებებს აყოლილ, თავისუფლება წართმეულ ადამიანებთან, რომელთა სიტყვას ჩალის ფასი უნდა დაედოს ქვეყნის შიგნითაც და ქვეყნის გარეთაც“.

საპარლამენტო უმრავლესობა თავის განცხადებაში ასევე აღნიშნავს, რომ ბიძინა ივანიშვილმა საკონსტიტუციო ცვლილებების ინიცირებით ქვეყანას მიხეილ სააკაშვილის „მორიგი ავანტიურის“ საფრთხე ააცილა იმით, რომ წინასწარ გახადა საჯარო მისი შესაძლო გეგმები პარლამენტის თანხმობის გარეშე მთავრობის გამოცვლის თაობაზე.

„ამდენად, თავად კონსტიტუციური ცვლილებების ინიცირების ფაქტიც კი საკმარისი აღმოჩნდა იმისათვის, რომ სააკაშვილის გეგმა ჩაშლილიყო - ახლა არც მისი „კოჰაბიტაციური“ სურვილების ჭეშმარიტების სჯერა ვინმეს და აღარც მისი კონსტიტუციური მექანიზმების. შესაბამისად, იგი დღესვე, სანამ კონსტიტუციაში ჯერ კიდევ არსებობს ეს ჩანაწერი, უკვე უძლურია გამოიყენოს ეს იარაღი. ამ იარაღით მას მხოლოდ საკუთარი პოლიტიკური თვითმკვლელობა შეუძლია“, - ნათქვამია განცხადებაში.

ქართული ოცნების დეპუტატები დეგეგმილი საკონსტიტუციო ცვლილებების სასარგებლოდ აპელირებენ ასევე ვენეციის კომისიის 2004 წლის მოსაზრებაზე, როდესაც მაშინდელი თებერვლის ცვლილებებით პრეზიდენტს პარლამენტის თანხმობის გარეშე ახალი მთავრობის დანიშვნის უფლება მიეცა ბევრი სხვა უფლებამოსილების გაფართოებასთან ერთად და ასევე მიმდინარე პოზიციაზე, რომელიც ვენეციის კომისიის პრეზიდენტმა ჯანი ბუკიკიომ გასულ კვირას თბილისში ვიზიტის დროს გამოთქვა.

„მე მესმის, რომ ბოლო საპარლამენტო არჩევნების შემდეგ მთავრობის და პარლამენტის სტაბილურობისთვის საჭიროა, რომ შეიცვალოს კონსტიტუცია, რათა შეიზღუდოს სახელმწიფო მეთაურის [პრეზიდენტის] უფლებამოსილებები პარლამენტის ნებართვის გარეშე მთავრობის დათხოვნასა და ახალი მთავრობის დანიშვნასთან დაკავშირებით“, – განაცხადა ბუკიკიომ 31 იანვარს პრემიერ–მინისტრ ივანიშვილთან გამართული შეხვედრის შემდეგ, თუმცა მოგვიანებით ასევე აღნიშნა, რომ მას არ ჰგონია პრეზიდენტ სააკაშვილს ივანიშვილის მთავრობის დათხოვნის გეგმები ჰქონდეს.

ვენეციის კომისიის 2004 წლის დასკვნაში კი ნათქვამია, რომ პარლამენტის თანხმობის გარეშე პრეზიდენტის მიერ დანიშნულ მთავრობას „არ ექნება ლეგიტიმურობა. როცა ახალი მთავრობის არჩევის შესახებ სამი წინადადება ჩავარდება, პრეზიდენტს არ უნდა ჰქონდეს უფლება დანიშნოს პიროვნება, რომელიც პრემიერ-მინისტრად არასოდეს აურჩევიათ, მაგრამ უნდა შეეძლოს დაითხოვოს პარლამენტი და მოქმედ პრემიერ-მინისტრს სთხოვოს დარჩეს თანამდებობაზე, რათა მიხედოს ყოველდღიურ საქმიანობას ახალი პარლამენტის არჩევამდე“.

უახლესი ამბები
23 მაი.'17 18:40
პროკურატურამ აუდიტის სამსახურის შუალედური ანგარიშის საფუძველზე გამოძიება დაიწყო
შუალედური ანგარიში 2015-2016 წლებში თბილისის მუნიციპალიტეტის საკუთრებაში არსებული ქონების მართვისა და განკარგვის საკითხს უკავშირდება.
23 მაი.'17 18:11
აზერბაიჯანის თავდაცვის მინისტრი საქართველოს სტუმრობს
ზაკირ ჰასანოვმა საქართველოს პრემიერ-მინისტრთან და თავდაცვის მინისტრთან შეხვედრებზე თავდაცვის სფეროში ორმხრივ და სამხრივ ურთიერთობებზე იმსჯელა.
23 მაი.'17 16:53
აფხაზეთში გერმანიის მოქალაქე დააკავეს
რუსეთის FSB-ს თანამშრომლებმა გერმანიის მოქალაქე „საზღვრის უკანონო გადაკვეთის“ გამო დააკავეს.
23 მაი.'17 15:15
საქართველოს ლიდერები მანჩესტერის თავდასხმას გმობენ
პრეზიდენტმა, პრემიერ-მინისტრმა და პარლამენტის თავმჯდომარემ ტერორისტული აქტის შემდეგ განცხადებები გამოაქვეყნეს.
23 მაი.'17 13:31
რესპუბლიკელები და თავისუფალი დემოკრატები გაერთიანების საკითხს განიხილავენ
2016 წლის საპარლამენტო არჩევნებზე თავისუფალმა დემოკრატებმა ხმების 4.63%,  ხოლო რესპუბლიკელებმა 1.55% მიიღეს.
22 მაი.'17 18:53
პროკურატურამ სტრასბურგის სასამართლოს მოსამართლის ძმის წინააღმდეგ საქმეზე გამოძიება შეწყვიტა
ნონა წოწორიამ განაცხადა, რომ გამოძიება სტრასბურგის სასამართლოში მის საქმიანობას უკავშირდებოდა.
22 მაი.'17 17:26
მოსკოვი აფხაზეთში ახალ სამართალდამცავ სტრუქტურას ქმნის
რუსეთმა და სეპარატისტულმა რეგიონმა ხელი მოაწერეს შეთანხმებას ერთობლივი საინფორმაციო-საკოორდინაციო ცენტრის ჩამოყალიბების თაობაზე.
22 მაი.'17 12:30
ჯეიმს მატისი: აშშ მზად არის საქართველოს თავდაცვის რეფორმაში დაეხმაროს
აშშ-ის თავდაცვის მდივანმა თავის ქართველ კოლეგას ლევან იზორიას წერილით მიმართა.
21 მაი.'17 16:34
კვირიკაშვილი იორდანიაში მეფე აბდულა II-ს და ფედერიკა მოგერინის შეხვდა
პრემიერ-მინისტრმა „ახლო აღმოსავლეთის, ჩრდილოეთ და აღმოსავლეთ აფრიკის 2017 წლის მსოფლიო ეკონომიკურ ფორუმში“ მიიღო მონაწილეობა.
20 მაი.'17 13:23
პარლამენტმა დროებითი საგამოძიებო კომისიის შექმნა მიზანშეუწონლად მიიჩნია
საპარლამენტო უმცირესობის ნაწილი სახელმწიფო აუდიტორის ფიზიკური შეურაცხყოფის საკითხის შესწავლის მიზნით კომისიის შექმნას ითხოვდა.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
5