Civil.ge-ს შესახებ
Eng | ქარ | Рус
ბოლო განახლება: 09:34 - 12 დეკ.'17
RSS
Mobile
Twitter
Facebook
მარათონი აფხაზეთის ლიდერობისთვის
სივილ ჯორჯია, თბილისი / 25 აგვ.'11 / 13:57


მარცხნიდან მარჯვნივ: ალექსანდრე ანქვაბი, რაულ ხაჯიმბა და სერგეი შამბა 12 აგვისტოს გამართულ ერთობლივ პრესკონფერენციაზე ჟურნალისტებს ესაუბრებიან. სამი კანდიდატი 18 აგვისტოს კვლავ შეიკრიბა, როდესაც ისინი მოქმედმა და ყოფილმა აფხაზმა დეპუტატებმა დახურულ შეხვედრაზე მიიწვიეს.

პარასკევს, სერგეი ბაღაფშის გარდაცვალებიდან სამი თვის თავზე, აფხაზი ამომრჩევლები ვადამდელ არჩევნებზე სეპარატისტული რეგიონის მესამე ლიდერს აირჩევენ.

ხუთი წლით სეპარატისტული რეგიონის პრეზიდენტის თანამდებობის მოსაპოვებლად ვიცე–პრეზიდენტი ალექსანდრე ანქვაბი, პრემიერ–მინისტრი სერგეი შამბა და ყოფილი ვიცე–პრეზიდენტი რაულ ხაჯიმბა იყრიან კენჭს. ამ უკანასკნელის მხარდამჭერია ოპოზიციური პარტია „აფხაზეთის ხალხთა ერთობის ფორუმი“. 

საარჩევნო მარათონს სამი კანდიდატის მონაწილეობით აშკარა ლიდერი არ ჰყავს, თუმცა აფხაზეთში ბოლო დროს განვითარებული მოვლენების შემდეგ, ზოგიერთი ანალიტიკოსი აცხადებს, რომ ანქვაბს, რომელიც თავს გარდაცვლილი ლიდერის სერგეი ბაღაფშის კურსის გამგრძელებლად მიიჩნევს, წარმატების უკეთესი შანსები აქვს.

საარჩევნო სეზონი აფხაზეთში კიდევ ორი კვირით გაგრძელდება იმ შემთხვევაში, თუ პირველ ტურში ვერც ერთი კანდიდატი ვერ მოაგროვებს ხმების ნახევარზე მეტს. ანალიტიკოსები ვარაუდობენ, რომ ამგვარი სცენარის შემთხვევაში, სავარაუდოდ, ანქვაბს და შამბას მოუწევთ მეორე ტურში ერთმანეთთან დაპირისპირება.

საარჩევნო კამპანიამ ყველაზე მეტი სიმწვავე 15 აგვისტოს შეიძინა, როდესაც შამბას მხარდამჭერებმა სოხუმში ღია ცის ქვეშ თენგიზ კიტოვანთან ინტერვიუს ჩვენება მოაწყვეს, სადაც კიტოვანი ამბობს, რომ ომის დროს ანქვაბი თბილისთან თანამშრომლობდა და ქართულ დაზვერვას ინფორმაციას აწვდიდა. 

ვიდეოს ჩვენების შემდეგ ანქვაბმა შამბა შავი პიარის გამოყენებაში დაადანაშაულა, მიუხედავად იმისა, რომ ორი კვირით ადრე სამივე კანდიდატმა „სუფთა და სამართლიანი არჩევნების“ შესახებ  შეთანხმებას მოაწერა ხელი, რომლის ფარგლებშიც მათ პირობა დადეს, რომ არ გამოიყენებდნენ „შავ ტექნოლოგიებს“ ერთმანეთის წინააღმდეგ საარჩევნო კამპანიის დროს.

თავად შამბა შეეცადა თავი შორს დაეჭირა ვიდეოინტერვიუს ჩვენებიდან და განაცხადა, რომ მას არაფერი ჰქონდა საერთო ამ ღონისძიების ორგანიზებასთან, მაგრამ მისმა საარჩევნო შტაბმა  გამოაქვეყნა განცხადება, რომელშიც პროკურატურას ანქვაბის ომისდროინდელი საქმიანობის გამოძიებისკენ მოუწოდა. იმ პერიოდში ანქვაბი სეპარატისტული რეგიონის შინაგან საქმეთა მინისტრი იყო. მანამდე კი 80–იანი წლების ბოლოს საბჭოთა საქართველოს შინაგან საქმეთა მინისტრის მოადგილე იყო. თუმცა,  ამ მოწოდების შემდეგ შამბას საარჩევნო შტაბს ეს მოთხოვნა აღარ გაუმეორებია.  ანქვაბმა განაცხადა, რომ იგი დიდ ყურადღებას არ აქცევს მის წინააღმდეგ ამგვარ ბრალდებებს, რადგანაც ვიდეოჩვენებას, მისი თქმით, „ბუმერანგის ეფექტი“ ჰქონდა მისი ორგანიზატორებისთვის.

საარჩევნო კამპანიის დროს შამბა პოპულიზმში დაადანაშაულეს, რადგანაც იგი ამომრჩევლებს პენსიების თითქმის ათჯერ გაზრდას დაპირდა.

რადიო „თავისუფლების“ რუსულენოვანი სამსახურისთვის „ეხო კავკაზა“–სთვის 24 აგვისტოს მიცემულ ინტერვიუში შამბამ განაცხადა, რომ ყველა მისი დაპირების განხორციელება შესაძლებელია ჩრდილოვანი ეკონომიკის აღმოფხვრის გზით. მისი თქმით, ანქვაბის დაპირება იყო პოპულისტური, რომელიც სოფლის მეურნეობის მხარდასაჭერად მილიონებს დაპირდა. მან ასევე განაცხადა, რომ რეგიონის ეკონომიკური განვითარების ცენტრში ტურიზმი უნდა მოექცეს და არა სოფლის მეურნეობის განვითარება. შამბა ასევე აცხადებს, რომ არჩევის შემთხვევაში, იგი მხოლოდ ერთი ვადით იმსახურებს ამ პოსტზე და მეორე ვადით პრეზიდენტობისთვის აღარ იბრძოლებს.

როგორც მოსალოდნელი იყო, პირველი სატელევიზიო დებატები კანდიდატებს შორის საარჩევნო კამპანიის კულმინაცია უნდა გამხდარიყო, თუმცა 20 აგვისტოს დაგეგმილი დებატები დაწყებამდე რამდენიმე საათით ადრე გადაიდო, რადგანაც სერგეი შამბა ავტოავარიის შედეგად მსუბუქად დაშავდა.

ბოლო დროს ორ კანდიდატს – ანქვაბსა და შამბას შორის მომხდარი დაპირისპირების გამო რაულ ხაჯიმბა გარკვეულწილად ჩრდილში მოექცა.

2005–2009 წლებში ხაჯიმბა სეპარატისტული რეგიონის ვიცე–პრეზიდენტი იყო. მან ეს პოსტი 2004 წლის საპრეზიდენტო არჩევნების შემდეგ აფხაზეთის ლიდერთან სერგეი ბაღაფშთან ძალაუფლების გაყოფის შესახებ მიღწეული შეთანხმების საფუძველზე დაიკავა.

მართალია იმ არჩევნებში ხაჯიმბას კანდიდატურას მოსკოვი ღიად უჭერდა მხარს, მაგრამ ბოლო წლებში იგი ხშირად ცდილობდა აფხაზეთის მოსკოვზე ზედმეტად დამოკიდებულება გაეკრიტიკებინა. იგი ხელისუფლებას რუსეთის მიერ გამოყოფილი ფინანსური დახმარების არაეფექტური გამოყენების გამო აკრიტიკებდა.

აგვისტოს დასაწყისში შამბამ და ხაჯიმბამ საარჩევნო სიებთან დაკავშირებით შეშფოთება გამოთქვეს და პარლამენტს ერთობლივი მიმართვა გაუგზავნეს, რათა კანონში ცვლილება შეეტანათ და არჩევნების დღეს ამომრჩეველთა რეგისტრაციაზე შეზღუდვა დაეწესებინათ. მართალია ანქვაბმა აღიარა „ნაკლოვანებები“, მაგრამ მან უარი თქვა შეერთებოდა ამ მიმართვას და განაცხადა, რომ არასწორი იყო საარჩევნო კოდექსის კარსმომდგარი არჩევნების წინ შეცვლა.

ამჟამად სეპარატისტული რეგიონის პრეზიდენტის მოვალეობებს პარლამენტის სპიკერი ნუგზარ აშუბა ასრულებს, ვინაიდან ვიცე–პრეზიდენტ ანქვაბს საარჩევნო კამპანიის დროს შვებულების აღება მოუხდა.

თბილისი მომავალ არჩევნებს „არალეგიტიმურად“ მიიჩნევს იმის გამო, რომ ის „ოკუპაციის პირობებში“ ტარდება.

 

ამავე თემაზე
უახლესი ამბები
11 დეკ.'17 17:42
კობახიძე: პრეზიდენტის არჩევა 300-წევრიანი საარჩევნო კოლეგიის მიერ ‘ძალაში რჩება’
მისი თქმით, სისტემას ხარვეზები გააჩნია, თუმცა მმართველმა პარტიამ გადაწყვიტა, რომ „პოლიტიკური კომპრომისის“ სახით ის ძალაში დატოვოს. 
11 დეკ.'17 17:27
ნარკოპოლიტიკის ლიბერალიზაციის მოთხოვნით თბილისში აქცია გაიმართა
აქციის მონაწილეებმა ნარკოპოლიტიკის საკითხზე პარლამენტში ინიცირებული საკანონმდებლო ცვლილებათა პაკეტის მიღება მოითხოვეს.
11 დეკ.'17 13:12
საქსტატი: 2017 წლის მესამე კვარტალში პირდაპირმა უცხოურმა ინვესტიციებმა 594 მლნ აშშ დოლარი შეადგინა
პირდაპირი უცხოური ინვესტიციების ყველაზე დიდი ოდენობა საქართველომ 2017 წლის მესამე კვარტალში აზერბაიჯანიდან მოიზიდა.
09 დეკ.'17 18:26
ეუთოში საქართველოს მეგობარი ქვეყნების ჯგუფი რუსული ოკუპაციის ფონზე მხარდაჭერას უსვამს ხაზს
სხვა საკითხებთან ერთად ჯგუფი ეთნიკური დისკრიმინაციის, რუსეთის სამხედრო ძალების გაძლიერების საკითხებზე საუბრობს.
09 დეკ.'17 14:34
უკრაინის ეროვნულმა პოლიციამ სააკაშვილი დააკავა
ექს-პრეზიდენტმა შიმშილობა დაიწყო და შესაძლოა შინაპატიმრობა შეეფარდოს.
08 დეკ.'17 17:21
ჯანელიძე ეუთოს საგარეო საქმეთა მინისტრთა საბჭოს სხდომაში მონაწილეობს
საგარეო საქმეთა მინისტრმა ოკუპირებულ ტერიტორიებზე არსებულ დარღვევებზე ისაუბრა და მოუწოდა, რომ შეიქმნას ევროპა გავლენის სფეროების გარეშე.
08 დეკ.'17 11:45
საგარეო საქმეთა სამინისტრო იერუსალიმთან დაკავშირებულ მოვლენებს ეხმაურება
სამინისტროს განცხადება მოჰყვა მმართველი პარტიის დეპუტატის ინიციატივას იერუსალიმის ისრაელის დედაქალაქად აღიარების თაობაზე.
07 დეკ.'17 19:32
პარლამენტმა მთავრობის სტრუქტურულ რეორგანიზაციას მხარი დაუჭირა
ცვლილებების ფარგლებში, რამდენიმე სამინისტრო შერწყმა და რეორგანიზაცია მოხდება.
07 დეკ.'17 17:02
კვირიკაშვილი იერუსალიმის შესახებ ღია წერილის გამო დეპუტატს საყვედურობს
პრემიერ-მინისტრმა უარყო დეპუტატის მოწოდება, რომ საქართველომ იერუსალიმთან დაკავშირებით პრეზიდენტ ტრამპის გადაწყვეტილება გაიზიაროს.
07 დეკ.'17 14:44
საქართველოს საპარლამენტო დელეგაცია შვედეთს სტუმრობს
ირაკლი კობახიძე შვედეთის მეფე კარლ გუსტავ XVI-ს, პარლამენტის თავმჯდომარეს და საგარეო საქმეთა მინისტრს შეხვდა.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
103