Civil.ge-ს შესახებ
Eng | ქარ | Рус
ბოლო განახლება: 09:34 - 12 დეკ.'17
RSS
Mobile
Twitter
Facebook
სააკაშვილი დეპუტატების რაოდენობის დაგეგმილი გაზრდის შესახებ
სივილ ჯორჯია, თბილისი / 27 ივლ.'11 / 13:19

პრეზიდენტმა სააკაშვილმა განაცხადა 26 ივლისს, რომ პირადად მას დეპუტატების რაოდენობის გაზრდა  ”მაინცდამაინც გულზე არ ეხატება”, თუმცა მისი პარტია იძულებული გახდა დათანხმებოდა ამ წინადადებას ოპოზიციასთან კომპრომისის მიღწევის მიზნით.

მან განაცხადა, რომ 27 ივნისს საარჩევნო სისტემის რეფორმაზე „ძირითად ოპოზიციურ პარტიებთან“ შეთანხმების მიღწევა ”მნიშვნელოვანი პოლიტიკური შემობრუნება” იყო.

„ოპოზიციის მოთხოვნით, ჩვენ დავთანხმდით იმას, რაც პირადად მე მაინცდამაინც გულზე არ მეხატება. ეს საკითხი  დეპუტატთა რაოდენობის  გაზრდას შეეხება. არ მომწონს ეს ფაქტი, მაგრამ საარჩევნი სისტემის შეცვლა, ოპოზიციის ერთ-ერთი მთავარი მოთხოვნა იყო“, – უპასუხა მან კითხვაზე, რომელიც  26 ივლისს ბათუმში თავის პოლონელ კოლეგასთან, ბრონისლავ კომოროვსკისთან ერთობლივ პრესკონფერენციაზე დაუსვეს.

მმართველი პარტია და ოპოზიციური პარტიები საარჩევნო სისტემის რეფორმაზე მოლაპარაკებებს 2010 წლის ნოემბრიდან აწარმოებდნენ. ოპოზიციის მიერ მოლაპარაკებების პროცესში არც ერთი საჯაროდ წარმოდგენილი წერილობითი შემოთავაზება არ ითვალისწინებდა დეპუტატების რაოდენობის გაზრდას. ეს იდეა პირველად 2011 წლის მარტში გაჩნდა, როდესაც მმართველმა პარტიამ საარჩევნო სისტემის რეფორმაზე საკუთარი წინადადებები წამოაყენა. მმართველი პარტიის მიერ ივნისის ბოლოს წარმოდგენილი შეცვილი წინადადებები კვლავ ითვალისწინებდა დეპუტატების რაოდენობის 150–დან 190–მდე გაზრდას. სწორედ ეს უკანასკნელი მოდელი გახდა მმართველ პარტიასა და რამოდენიმე ოპოზიციურ პარტიას შორის შეთანხმების საფუძველი. ოპოზიციურ რვიანში შემავალი პარტიებიდან ექვსმა უარი თქვა ამ შეთანხმებას შეერთებოდა.

„მე ვიცი, რომ ჩვენი მეგობრის, ჩემი კოლეგის პარტია, პირიქით, პოლონეთში დეპუტატების რაოდენობის შემცირებას ითხოვს.  სამწუხაროდ, საქართველოში მოხდა პირიქით... ამიტომ, თუ თქვენ შეამცირებთ, ჩვენ მხოლოდ შეგვშურდება“, – განაცხადა სააკაშვილმა.

"მაგრამ ეს იყო ჩვენი კომპრომისი ოპოზიციასთან, რადგან ჩვენ გვინდა ისეთი საარჩევნო სისტემა, რომ არჩევნებში მონაწილეობით  რეზულტატი იყოს ლეგიტიმური და მაქსიმალურად ითვალისწინებდეს საქართველოს საზოგადოების მთელი სპექტრის ინტერესებს“, – განაცხადა მან, "მიგვაჩნია, რომ იმ რთულ გეოპოლიტიკურ ვითარებაში, რომელშიც ახლა ვიმყოფებით, დემოკრატია ჩვენთვის ერთგვარი დაცვაა. ჩვენ გვაქვს პლურალისტული მედია, ამიტომ ქართველები მაინცდამაინც უცხოურ ტელევიზიებზე არ არიან დამოკიდებული, იმიტომ რომ ადგილზე შეგიძლია ნებისმიერი ტელევიზიიდან ნებისმიერი პრესის საშუალების ნახვა. ჩვენ გვყავს კარგად განვითარებული პოლიტიკური კლასი, რაც ასევე სერიოზული დაცვაა იმისათვის, რომ საქართველოს შიგნიდან დესტაბილიზაცია ვერ მოხდეს“.

მმართველი პარტიის შემოთავაზება დეპუტატების რაოდენობის ზრდის თაობაზე სამართლებრივი დაბრკოლების წინაშე დგას, აცხადებენ ოპონენტები, რადგანაც დეპუტატების რაოდენობა 2003 წლის რეფერენდუმის გადაწყვეტილებით შემცირდა და ამ გადაწყვეტილების გადახედვა მხოლოდ ახალი რეფერენდუმითაა შესაძლებელი.

თავად პრეზიდენტი სააკაშვილი დეპუტატების რაოდენობის 150–მდე შემცირების ძლიერი მხარდამჭერი იყო. პარლამენტში 2005 წლის 10 თებერვალს ყოველწლიური მოხსენებით გამოსვლისას მან დეპუტატებს იმ საკონსტიტუციო ცვლილებების მიღებისკენ მოუწოდა, რომლითაც დეპუტატების რაოდენობა 2003 რეფერენდუმის გადაწყვეტილებათან მოვიდოდა შესაბამისობაში.

“2,300,000 ამომრჩეველმა განაცხადა [2003 წლის რეფერენდუმის დროს], რომ დეპუტატთა რიცხვი არ უნდა აღემატებოდეს 150-ს, და თუ ჩვენ ამას ვერ შევასრულებთ, ეს იქნება იმ ამორჩეველთა დამცირება“, – განაცხადა სააკაშვილმა 2005 წლის 10 თებერვალს.

2005 წლის 17 თებერვალს პარლამენტმა საკონსტიტუციო ცვლილება მიიღო, რომლითაც პარლამენტში დეპუტატების რაოდენობა 150-მდე შემცირდა. იმ დღეს პრეზიდენტმა სააკაშვილმა განაცხადა: “ის, რომ პარლამენტმა, მისმა უკლებლივ ყველა პოლიტიკურმა ჯგუფმა შეძლო პარლამენტის რიცხოვნობის 235-დან 150-მდე შემცირების ისტორიული გადაწყვეტილების მიღება მიუთითებს იმას, რომ საქართველოს ჰყავს პარლამენტი, რომელიც უსმენს ამომრჩევლის ნებას”.

2008 წლის მარტში, როდესაც საარჩევნო სისტემის გარშემო დავა მიმდინარეობდა, პრეზიდენტმა სააკაშვილმა განაცხადა, რომ ყველა პოლიტიკური ძალის თანხმობის შემთხვევაში, ის მზადაა გადახედოს რეფერენდუმის შედეგებს და 150 წევრიანი პარლამენტის რაოდენობა პროპორციული მანდატების ხარჯზე გაზარდოს.

”თქვენ იცით, რომ რეფერენდუმის შედეგი იყო 150 კაციანი პარლამენტი, მაგრამ თუ ეს მოემსახურება ეროვნულ თანხმობას, სხვადასხვა პარტიებს შორის კონსენსუსს, ჩვენ მზად ვართ ასევე, რა თქმა უნდა, ავუხსნათ ჩვენ ხალხს, რომ ამისთვის ღირს 45 თუ 35 ადგილის დამატება, მაგრამ იმ პირობებში, თუ ყველა პოლიტიკური ძალა ამაზე შეთანხმდება,”– განაცხადა სააკაშვილმა 2008 წლის 18 მარტს.

ამავე თემაზე
უახლესი ამბები
11 დეკ.'17 17:42
კობახიძე: პრეზიდენტის არჩევა 300-წევრიანი საარჩევნო კოლეგიის მიერ ‘ძალაში რჩება’
მისი თქმით, სისტემას ხარვეზები გააჩნია, თუმცა მმართველმა პარტიამ გადაწყვიტა, რომ „პოლიტიკური კომპრომისის“ სახით ის ძალაში დატოვოს. 
11 დეკ.'17 17:27
ნარკოპოლიტიკის ლიბერალიზაციის მოთხოვნით თბილისში აქცია გაიმართა
აქციის მონაწილეებმა ნარკოპოლიტიკის საკითხზე პარლამენტში ინიცირებული საკანონმდებლო ცვლილებათა პაკეტის მიღება მოითხოვეს.
11 დეკ.'17 13:12
საქსტატი: 2017 წლის მესამე კვარტალში პირდაპირმა უცხოურმა ინვესტიციებმა 594 მლნ აშშ დოლარი შეადგინა
პირდაპირი უცხოური ინვესტიციების ყველაზე დიდი ოდენობა საქართველომ 2017 წლის მესამე კვარტალში აზერბაიჯანიდან მოიზიდა.
09 დეკ.'17 18:26
ეუთოში საქართველოს მეგობარი ქვეყნების ჯგუფი რუსული ოკუპაციის ფონზე მხარდაჭერას უსვამს ხაზს
სხვა საკითხებთან ერთად ჯგუფი ეთნიკური დისკრიმინაციის, რუსეთის სამხედრო ძალების გაძლიერების საკითხებზე საუბრობს.
09 დეკ.'17 14:34
უკრაინის ეროვნულმა პოლიციამ სააკაშვილი დააკავა
ექს-პრეზიდენტმა შიმშილობა დაიწყო და შესაძლოა შინაპატიმრობა შეეფარდოს.
08 დეკ.'17 17:21
ჯანელიძე ეუთოს საგარეო საქმეთა მინისტრთა საბჭოს სხდომაში მონაწილეობს
საგარეო საქმეთა მინისტრმა ოკუპირებულ ტერიტორიებზე არსებულ დარღვევებზე ისაუბრა და მოუწოდა, რომ შეიქმნას ევროპა გავლენის სფეროების გარეშე.
08 დეკ.'17 11:45
საგარეო საქმეთა სამინისტრო იერუსალიმთან დაკავშირებულ მოვლენებს ეხმაურება
სამინისტროს განცხადება მოჰყვა მმართველი პარტიის დეპუტატის ინიციატივას იერუსალიმის ისრაელის დედაქალაქად აღიარების თაობაზე.
07 დეკ.'17 19:32
პარლამენტმა მთავრობის სტრუქტურულ რეორგანიზაციას მხარი დაუჭირა
ცვლილებების ფარგლებში, რამდენიმე სამინისტრო შერწყმა და რეორგანიზაცია მოხდება.
07 დეკ.'17 17:02
კვირიკაშვილი იერუსალიმის შესახებ ღია წერილის გამო დეპუტატს საყვედურობს
პრემიერ-მინისტრმა უარყო დეპუტატის მოწოდება, რომ საქართველომ იერუსალიმთან დაკავშირებით პრეზიდენტ ტრამპის გადაწყვეტილება გაიზიაროს.
07 დეკ.'17 14:44
საქართველოს საპარლამენტო დელეგაცია შვედეთს სტუმრობს
ირაკლი კობახიძე შვედეთის მეფე კარლ გუსტავ XVI-ს, პარლამენტის თავმჯდომარეს და საგარეო საქმეთა მინისტრს შეხვდა.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
107