Civil.ge-ს შესახებ
Eng | ქარ | Рус
ბოლო განახლება: 15:29 - 12 დეკ.'17
RSS
Mobile
Twitter
Facebook
ფოტოგრაფების საქმეზე გამჭირვალე სასამართლო პროცესის დაპირება
სივილ ჯორჯია, თბილისი / 14 ივლ.'11 / 12:32


შსს–ს შენობასთან შეკრებილი ჟურნალისტები, 13 ივლისი. ფოტო: გურამ მურადოვი/Civil.ge

"მცირე“ ნაწილის გარდა, ჯაშუშობის ბრალდებით დაკავებული ოთხი ფოტოგრაფის მიმართ არსებული სისხლის სამართლის საქმის სასამართლოში განხილვის საჯაროობა და გამჭირვალობა უზრუნველყოფილი იქნება, განაცხადა საქართველოს ხელისუფლებამ 13 ივლისს.

მედია აქტივისტების და ჟურნალისტების ჯგუფი აქტიურ კამპანიას აწარმოებს საქმეზე "საიდუმლო“ გრიფის მოხსნის მოთხოვნით.

13 ივლისს საქართველოს პროკურატურამ და შინაგან საქმეთა მინისტრმა ვანო მერაბიშვილმა განაცხადეს, რომ სასამართლო პროცესის ძირითადი ნაწილი ღია იქნება.

"პროკურატურა შუამდგომლობით მიმართავს სასამართლოს, დახურულ სხდომაზე განიხილოს მხოლოდ მტკიცებულებათა ის მცირე ნაწილი, რომელიც სახელმწიფო საიდუმლოების შემცველია“, – განაცხადა პროკურატურამ. 

თბილისის საქალაქო სასამართლოში წინასწარი მოსმენა 2011 წლის 1 სექტემბერს არის დაგეგმილი.

ვანო მერაბიშვილმა 13 ივლისს განაცხადა ჟურნალისტების მცირე ჯგუფთან შეხვედრაზე, რომლებიც ძირითადად დასავლურ საინფორმაციო სააგენტოებისთვის მუშაობენ, რომ საზოგადოებას შეეძლება გაეცნოს ამ მტკიცებულებებს სასამართლო მოსმენების დროს, რომლის ძირითადი ნაწილიც საჯარო იქნება, გარდა იმ ნაწილისა, სადაც სახელმწიფო საიდუმლოების შემცველი დოკუმენტების განხილვა მოხდება.

13 ივლისს მერაბიშვილმა ცალკე შეხვედრა გამართა იმ ჟურნალისტ აქტივისტებთან და ადგილობრივ უფლებადამცველ ჯგუფებთან, რომლებმაც ბოლო დღეების განმავლობაში ამ მოთხოვნით მთელი რიგი აქციები და ასევე თბილისში აკრედიტებულ დასავლელ დიპლომატებთან შეხვედრები გამართეს საქმეზე "საიდუმლო“ გრიფის მოხსნის მოთხოვნით. შეხვედრის შემდეგ მედია აქტივისტებმა განაცხადეს, რომ მათ დაკავებული ფოტოგრაფების თავდებით გათავისუფლება მოითხოვეს, თუმცა უარი მიიღეს იმ მოტივით, რომ გათავისუფლებამ შესაძლოა გამოძიებას ხელი შეუშალოს.

საგამოძიებო ჟურნალისტმა ნინო ზურიაშვილმა, რომელიც დანარჩენ ექვს კოლეგასთან ერთად ასევე მონაწილეობდა შეხვედრაში, განაცხადა, რომ შს მინისტრისგან რაიმე ისეთი სიახლე ვერ მოისმინა, რაც გააბათილებდა მის ეჭვებს საქმის ოფიციალურ ვერსიასთან დაკავშირებით.

ზურაბ ქურციკიძე, European Pressphoto Agency-ის (EPA) კორესპონდენტი, გიორგი აბდალაძე დასავლურ მედია სააგენტოებზე მომუშავე ფოტოკორესპონდენტი და საგარეო საქმეთა სამინისტროს ფოტოგრაფი, ირაკლი გედენიძე, პრეზიდენტის პირადი ფოტოგრაფი 7 ივლისს ჯაშუშობის ბრალდებით შუაღამისას დააკავეს. მათ თბილისის საქალაქო სასამართლომ 8 ივლისს წინასწარი პატიმრობა შეუფარდა. 

გედენიძის მეუღლე ნათია გედენიძე, გაზეთ „პრაიმტაიმის“ ფოტოგრაფი, დანარჩენებთან ერთად დააპატიმრეს, თუმცა მოგვიანებით, იგი ჯერ გაათავისუფლეს და შემდეგ კი სასამართლომ გირაო შეუფარდა. ნათია გედენიძის მიმართ სისხლის სამართლის საქმე არ შეწყვეტილა. მისმა მეუღლემ გამოძიებას აღიარებითი ჩვენება მისცა, სადაც აცხადებს, რომ ქურციკიძემ იგი "დააშანტაჟა“, რათა კონფიდენციალური ინფორმაცია მიეღო.

შინაგან საქმეთა მინისტრმა ვანო მერაბიშვილმა განუცხადა ჟურნალისტებს 13 ივლისს, რომ გამოძიებას საკმარისი მტკიცებულება აქვს, რომელიც მიუთითებს, რომ ქურციკიძეს 2004 წლიდან კავშირი ჰქონდა რუსეთის სამხედრო დაზვერვის თანამშრომლებთან, კერძოდ კი ანატოლი სინიცინთან და სერგეი ოკროკოვთან.

ამ ორი ადამიანის ვინაობა საქართველოში პირველად 2006 წელს გახდა ცნობილი, როდესაც საქართველომ რუსეთის ოთხი მოქალაქე ჯაშუშობის ბრალდებით დააკავა. იმ დროს, საქართველოს ხელისუფლებამ განაცხადა, რომ ჯაშუშური ქსელის კოორდინაცია საქართველოს გარედან ხდებოდა, რუსეთის სამხედრო დაზვერვის ოფიცრის ანატოლი სინიცინის მიერ.

მერაბიშვილმა ასევე განაცხადა, რომ არსებობს მტკიცებულებები, რომლებიც მიანიშნებს, რომ ქურციკიძემ 2004 წლის შემდეგ ათობით სატელეფონო კონტაქტი განახორციელა რუსული სამხედრო დაზვერვის თანამშრომლებთან.

საქართველოს საზოგადოებრივი მაუწყებლის სამეურვეო საბჭოს წევრმა ნინო დანელიამ, რომელიც მერაბიშვილთან შეხვედრაში მონაწილე მედია აქტივიტების ჯგუფში შედიოდა, განაცხადა, რომ მათ სატელეფონო ზარების ამონაწერი აჩვენეს, რომელზეც მერაბიშვილმა განაცხადა, რომ ქურციკიძე რუსეთის დაზვერვის ოფიცრებს ეკონტაქტებოდა.

მისი თქმით, ჟურნალისტებს უთხრეს, რომ 2004 წელს სატელეფონო ზარები “გრუ“-ს აგენტებთან განხორციელდა იმ ნომრიდან, რომლითაც ქურციკიძე სარგებლობდა, თუმცა იმ დროისთვის არ იყო გაფორმებული ქურციკიძის სახელზე – ნომერი ცხინვალში მცხოვრები ქალბატონის სახელზე იყო რეგისტრირებული. მოგვიანებით კი, იგივე ნომერი ქურციკიძის სახელზე დარეგისტრირდა. დანელიას თქმით, შს მინისტრს მათთვის საქმეში არსებული სხვა მტკიცებულებები არ უჩვენებია.

გაზეთ „რეზონანსის“ რედაქტორმა ლაშა ტუღუშმა, რომელიც ასევე ესწრებოდა შეხვედრას, განაცხადა, რომ ხელისუფლების 13 ივლისის განცხადება, რომ სასამართლო პროცესი ღია იქნება საზოგადოებისთვის, ნაწილობრივ მედიის ადვოკატირების კოალიციის კამპანიის შედეგია. მისი თქმით, კამპანია გაგრძელდება პროცესის შემდგომი მონიტორინგის მიზნით.

მერაბიშვილმა 13 ივლისს ჟურნალისტებს განუცხადა, რომ EPA–ს ფოტოგრაფის, ზურაბ ქურციკიძის წინააღმდეგ წაყენებული ბრალდებები, არ ნიშნავს იმას, რომ გამოძიება ეჭვობს, რომ მისი სააგენტო ან სააგენტოს სხვა თანამშრომელია საქმეში ჩართული; მისი თქმით, EPA–ს ამ საქმესთან არანაირი კავშირი არ აქვს.

ფოტოგრაფების საქმეზე გამოქვეყნებულ პირველ განცხადებაში შსს აცხადებდა, რომ დაკავებულებს ბრალად ედებოდათ „ერთ-ერთი უცხო ქვეყნის სპეცსამსახურის საფარქვეშ მოქმედი ორგანიზაციისთვის, საქართველოს ინტერესების საზიანოდ, მათი სამსახურებრივი მდგომარეობიდან გამომდინარე, სხვადასხვა სახის ინფორმაციის  მიწოდება“. მოგვიანებით, შსს–მ დააკონკრეტა, რომ რუსულ სპეცსამსახურს გულისხმობდა.
 

ამავე თემაზე
უახლესი ამბები
12 დეკ.'17 15:29
ჟენევასა და ბერლინში საქართველოს დიპლომატიურ მისიებს ახალი ელჩები უხელმძღვანელებენ
ვიქტორ დოლიძე და ელგუჯა ხოკრიშვილი უფლებამოსილების განხორციელებას 2018 წლის იანვრიდან შეუდგებიან.
12 დეკ.'17 02:01
კიევის სასამართლომ სააკაშვილი გაათავისუფლა
სასამართლომ არ დააკმაყოფილა პროკურატურის შუამდგომლობა სააკაშვილისთვის ორთვიანი შინაპატიმრობის შეფარდების თაობაზე.
11 დეკ.'17 17:42
კობახიძე: პრეზიდენტის არჩევა 300-წევრიანი საარჩევნო კოლეგიის მიერ ‘ძალაში რჩება’
მისი თქმით, სისტემას ხარვეზები გააჩნია, თუმცა მმართველმა პარტიამ გადაწყვიტა, რომ „პოლიტიკური კომპრომისის“ სახით ის ძალაში დატოვოს. 
11 დეკ.'17 17:27
ნარკოპოლიტიკის ლიბერალიზაციის მოთხოვნით თბილისში აქცია გაიმართა
აქციის მონაწილეებმა ნარკოპოლიტიკის საკითხზე პარლამენტში ინიცირებული საკანონმდებლო ცვლილებათა პაკეტის მიღება მოითხოვეს.
11 დეკ.'17 13:12
საქსტატი: 2017 წლის მესამე კვარტალში პირდაპირმა უცხოურმა ინვესტიციებმა 594 მლნ აშშ დოლარი შეადგინა
პირდაპირი უცხოური ინვესტიციების ყველაზე დიდი ოდენობა საქართველომ 2017 წლის მესამე კვარტალში აზერბაიჯანიდან მოიზიდა.
09 დეკ.'17 18:26
ეუთოში საქართველოს მეგობარი ქვეყნების ჯგუფი რუსული ოკუპაციის ფონზე მხარდაჭერას უსვამს ხაზს
სხვა საკითხებთან ერთად ჯგუფი ეთნიკური დისკრიმინაციის, რუსეთის სამხედრო ძალების გაძლიერების საკითხებზე საუბრობს.
09 დეკ.'17 14:34
უკრაინის ეროვნულმა პოლიციამ სააკაშვილი დააკავა
ექს-პრეზიდენტმა შიმშილობა დაიწყო და შესაძლოა შინაპატიმრობა შეეფარდოს.
08 დეკ.'17 17:21
ჯანელიძე ეუთოს საგარეო საქმეთა მინისტრთა საბჭოს სხდომაში მონაწილეობს
საგარეო საქმეთა მინისტრმა ოკუპირებულ ტერიტორიებზე არსებულ დარღვევებზე ისაუბრა და მოუწოდა, რომ შეიქმნას ევროპა გავლენის სფეროების გარეშე.
08 დეკ.'17 11:45
საგარეო საქმეთა სამინისტრო იერუსალიმთან დაკავშირებულ მოვლენებს ეხმაურება
სამინისტროს განცხადება მოჰყვა მმართველი პარტიის დეპუტატის ინიციატივას იერუსალიმის ისრაელის დედაქალაქად აღიარების თაობაზე.
07 დეკ.'17 19:32
პარლამენტმა მთავრობის სტრუქტურულ რეორგანიზაციას მხარი დაუჭირა
ცვლილებების ფარგლებში, რამდენიმე სამინისტრო შერწყმა და რეორგანიზაცია მოხდება.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
110