Civil.ge-ს შესახებ
Eng | ქარ | Рус
ბოლო განახლება: 18:51 - 12 დეკ.'17
RSS
Mobile
Twitter
Facebook
ევროპის საბჭოს საპარლამენტო ასამბლეის სხდომაზე საქართველოზე იმსჯელეს
სივილ ჯორჯია, თბილისი / 13 აპრ.'11 / 17:43

13 აპრილს ევროპის საბჭოს საპარლამენტო ასამბლეამ (PACE) საქართველოს მიერ ევროპის საბჭოში გაწევრიანებისას აღებული ვალდებულებების შესრულების თაობაზე მორიგი რეზოლუცია მიიღო.

რეზოლუცია მიესალმება საქართველოს ხელისუფლების "მნიშვნელოვან ძალისხმევას“ ვალდებულებების შესრულების კუთხით და იმ "მნიშვნელოვან პროგრესს“, რომელსაც ქვეყანამ აგვისტოს ომის შედეგების მიუხედავად 2008 წლის მონიტორინგის ანგარიშის შემდეგ მიაღწია. ამავე დროს რეზოლუციში საუბარია სხვადასხვა სფეროებში არსებულ პრობლემებზეც.

რეზოლუციის მიღებას წინ უძღოდა დებატები მოხსენების ირგვლივ, რომელიც საქართველოს საკითხზე ორმა თანამომხსენებელმა, დანიელმა დეპუტატმა მაიკლ იენსენმა და ალბანელმა დეპუტატმა კასტრიო ისლამიმ მოამზადეს.

დებატების დროს, გამომსვლელთა უმეტესობამ განაცხადა, რომ მოხსენება "დაბალანსებულია“. როგორც ერთ–ერთმა გამომსვლელმა აღნიშნა, თანამომხსენებლებმა "ოქროს შუალედის“ დაცვა მოახერხეს, რომლის დროსაც პროგრესსაც და ხარვეზებსაც თანაბარი ყურადღება დაეთმო. 

ყველაზე მეტი კრიტიკა რუსული დელეგაციის მხრიდან წამოვიდა. რუსი დეპუტატების შეფასებით,  მოხსენება სრულად არ ასახავდა საქართველოში არსებულ პრობლემებს, მათ შორის "პოლიტიკური პატიმრების“ კუთხით. 

რუსეთის მმართველი პარტიის „ედინაია როსიას“ დეპუტატმა სერგეი მარკოვმა განაცხადა, რომ მოხსენება "შერეულ შთაბეჭდილებას ტოვებს“; მისი თქმით, მოხსენება არ ეხება "რეალურ საქართველოს, სადაც ოპოზიცია ცუდ მდგომარეობაში იმყოფება და შეშინებულია, სადაც სატელევიზიო არხები ხელისუფლების კონტროლის ქვეშ არიან“.

PACE–ში რუსეთის დელეგაციის ხელმძღვანელმა, დეპუტატმა კონსტანტინე კოსაჩევმა განაცხადა, რომ რუსეთს ქართველი ხალხის წარმატებები გულწრფელად გაუხარდება, რადგან მათ "მეგობრებად“ მიიჩნევს. კოსაჩევის თქმით, ახლა, როდესაც ყველა შეშფოთებას გამოთქვამს ლიბიის მოვლენებთან დაკავშირებით, "ჩვენ უნდა გვახსოვდეს, რომ პრეზიდენტი სააკაშვილი შეეცადა ანალოგიურად მოქცეოდა საკუთარ ხალხს“ 2008 წლის აგვისტოში.

"კადაფისთან შედარებისას, იქნებ ჩეჩნეთი გაიხსენოთ,“ – უპასუხა მას დეპუტატმა მმართველი პარტიიდან აკაკი მინაშვილმა დებატების დროს, "პოლიტიკურ პატიმრებზე [საუბრისას], იქნებ ხადარკოვსკი გაიხსენოთ; რაც შეეხება მეგობრობაზე საუბარს – ჩვენ ძალიან კარგად ვიცით, რაც არის თქვენი მეგობრობა; თქვენი მეგობრობა აფხაზეთიდან და სამხრეთ ოსეთიდან ასიათასობით ქართველის გამოძევებაა“.

რეზოლუცია, რომელიც საქართველოს დელეგაციამ ძირითადად დადებითად შეაფასა, მიესალმება "პოლარიზაციის და კონფრონტაციული გარემოს დაძლევისკენ“ და "ოპოზიციის როლის გაძლიერებისკენ” მიმართულ ხელისუფლების ძალისხმევას.

რეზოლუციაში ნათქვამია, რომ 2012 წლის საპარლამენტო და 2013 წლის საპრეზიდენტო არჩევნები "ლაკმუსის ტესტი იქნება“. იგი პოლიტიკურ პარტიებს მოუწოდებს ისეთ საარჩევნო სისტემაზე შეთანხმდნენ, რომელიც ყველა მონაწილე მხარის ნდობას დაიმსახურებს.

მიესალმება რა საკონსტიტუციო ცვლილებებს, რომლებიც 2013 წლის ბოლოს შევა ძალაში, რეზოლუცია ვენეციის კომისიის რეკომენდაციების გათვალისწინებისკენ მოუწოდებს ხელისუფლებას. კერძოდ, რეზოლუცია მოუწოდებს საქართველოს ხელისუფლებას მთავრობისთვის უნდობლობის გამოცხადების პროცედურებს გადახედოს იმგვარად, რომ ამ პროცესში პარლამენტის უფლებამოსილება გაძლიერდეს; დოკუმენტი საბიუჯეტო საკითხებში პარლამენტის როლის გაზრდისკენაც მოუწოდებს. 

რეზოლუცია შეშფოთებას გამოთქვამს "მართლმსაჯულების განხორციელების პრობლემებთან დაკავშირებით, რამაც შესაძლოა კანონის თანაბრად გამოყენების პრინციპებს საფრთხე შეუქმნას“.

"ასამბლეა საქართველოს ხელისუფლებას ამ პრობლემების მოგვარებას ურჩევს, ვინაიდან მოუგვარებლობამ შესაძლოა ხელისუფლების მიერ სასამართლო სისტემის რეფორმირების სფეროში მიღწეულ პროგრესს და სასამართლო სისტემის დამოუკიდებლობის გაძლიერებას ძირი გამოუთხაროს,“ – ნათქვამია რეზოლუციაში.

რეზოლუციაში ნახსენებია რომ არსებობს "მუდმივი ბრალდებები, რომლის თანახმად მაღალი დონის კორუფცია მთლიანად არ არის აღმოფხვრილი“. დოკუმენტში ნათქვამია, რომ საპროტესტო აქციების დროს პოლიციის მიერ ძალის გადამეტებული გამოყენების შესახებ ბრალდებების გამოძიება "არც თუ ეფექტურად და სისტემატურად ხდება“.     

რეზოლუცია მიესალმა საქართველოს მთავრობის "პოლიტიკურ ნებას“ გადაჭრას ციხეების გადატვირთულობის პრობლემა და პატიმრების არასათანადო პირობები. დოკუმენტში ნათქვამია, რომ პატიმართა რაოდენობის ზრდა "ძალიან მკაცრი, ხანდახან არაპროპორციული” სასჯელებითაც არის განპირობებული, ისევე როგორც დანაშაულთა შეკრებითობის პრინციპით.

რეზოლუცია მიესალმა პროკურატურის შესახებ კანონის ძალაში შესვლას, თუმცა აღნიშნა, რომ ის მნიშვნელოვანი უფლებამოსილებები, რომელიც იუსტიციის მინისტრს მიენიჭა - მათ შორის უფლება პირადად აწარმოოს სისხლის სამართლებრივი დევნა ისეთი მაღალი რანგის ოფიციალური პირების მიმართ, როგორიცაა პრეზიდენტი, მთავრობის წევრები, ასევე მოსამართლეები, პარლამენტის წევრები, უნდა გაუქმდეს.

რეზოლუცია „სინანულს“ გამოთქვამს იმის გამო, რომ საქართველომ ჯერაც არ შეასრულა ვალდებულება და რეგიონალური და უმცირეობათა ენების შესახებ ევროპულ ქარტიას ხელი არ მოაწერა. რეზოლუცია მოუწოდებს საქართველოს დოკუმენტს "შემდგომი დაყოვნების გარეშე“ მოაწეროს ხელი და მისი რატიფიცირება მოახდინოს.

რეზოლუციამ შეშფოთება გამოხატა იმ "მეთოდის გამო, რა გზითაც ცოტა ხნის წინ დევნილები გამოასახლეს თბილისში თავიანთი საცხოვრებლებიდან“. როდესაც დებატების დროს ეს საკითხი ერთ–ერთმა გამომსვლელმა წამოწია, დეპუტატმა პეტრე ცისკარიშვილმა მმართველი პარტიიდან ასე უპასუხა: "არ მინდა, რომ თქვენ, ძვირფასო კოლეგებო, ფაქტების არასწორი ინტერპრეტაცია მოახდინოთ და განსახლების პროცესს ’გამოსახლება’ ან ’ხალხის ქუჩაში გაყრა’ უწოდოთ“.

უახლესი ამბები
12 დეკ.'17 18:51
დეპუტატები ქალთა სავალდებულო კვოტირების ინიციატივას მხარს უჭერენ
დეპუტატ ეკა ბესელიას თქმით, საკანონმდებლო ინიციატივის მიღება 2018 წლის ადრეულ გაზაფხულზე იგეგმება. 
12 დეკ.'17 16:29
ჟენევასა და ბერლინში საქართველოს დიპლომატიურ მისიებს ახალი ელჩები უხელმძღვანელებენ
ვიქტორ დოლიძე და ელგუჯა ხოკრიშვილი უფლებამოსილების განხორციელებას 2018 წლის იანვრიდან შეუდგებიან.
12 დეკ.'17 02:01
კიევის სასამართლომ სააკაშვილი გაათავისუფლა
სასამართლომ არ დააკმაყოფილა პროკურატურის შუამდგომლობა სააკაშვილისთვის ორთვიანი შინაპატიმრობის შეფარდების თაობაზე.
11 დეკ.'17 17:42
კობახიძე: პრეზიდენტის არჩევა 300-წევრიანი საარჩევნო კოლეგიის მიერ ‘ძალაში რჩება’
მისი თქმით, სისტემას ხარვეზები გააჩნია, თუმცა მმართველმა პარტიამ გადაწყვიტა, რომ „პოლიტიკური კომპრომისის“ სახით ის ძალაში დატოვოს. 
11 დეკ.'17 17:27
ნარკოპოლიტიკის ლიბერალიზაციის მოთხოვნით თბილისში აქცია გაიმართა
აქციის მონაწილეებმა ნარკოპოლიტიკის საკითხზე პარლამენტში ინიცირებული საკანონმდებლო ცვლილებათა პაკეტის მიღება მოითხოვეს.
11 დეკ.'17 13:12
საქსტატი: 2017 წლის მესამე კვარტალში პირდაპირმა უცხოურმა ინვესტიციებმა 594 მლნ აშშ დოლარი შეადგინა
პირდაპირი უცხოური ინვესტიციების ყველაზე დიდი ოდენობა საქართველომ 2017 წლის მესამე კვარტალში აზერბაიჯანიდან მოიზიდა.
09 დეკ.'17 18:26
ეუთოში საქართველოს მეგობარი ქვეყნების ჯგუფი რუსული ოკუპაციის ფონზე მხარდაჭერას უსვამს ხაზს
სხვა საკითხებთან ერთად ჯგუფი ეთნიკური დისკრიმინაციის, რუსეთის სამხედრო ძალების გაძლიერების საკითხებზე საუბრობს.
09 დეკ.'17 14:34
უკრაინის ეროვნულმა პოლიციამ სააკაშვილი დააკავა
ექს-პრეზიდენტმა შიმშილობა დაიწყო და შესაძლოა შინაპატიმრობა შეეფარდოს.
08 დეკ.'17 17:21
ჯანელიძე ეუთოს საგარეო საქმეთა მინისტრთა საბჭოს სხდომაში მონაწილეობს
საგარეო საქმეთა მინისტრმა ოკუპირებულ ტერიტორიებზე არსებულ დარღვევებზე ისაუბრა და მოუწოდა, რომ შეიქმნას ევროპა გავლენის სფეროების გარეშე.
08 დეკ.'17 11:45
საგარეო საქმეთა სამინისტრო იერუსალიმთან დაკავშირებულ მოვლენებს ეხმაურება
სამინისტროს განცხადება მოჰყვა მმართველი პარტიის დეპუტატის ინიციატივას იერუსალიმის ისრაელის დედაქალაქად აღიარების თაობაზე.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
96