RSS
Mobile
Twitter
Facebook
• სააკაშვილი: ქართველი დამკვირვებლების გაგზავნა წინასწარ იყო შეთანხმებული უკრაინასთან.
მაშინ როდესაც ქართული ტელეკომპანიები ბოლო დღეებში აქტიურად აშუქებდნენ უკრაინიდან საპრეზიდენტო არჩევნების თემას, 18 იანვარს მათ საერთოდ არ გააშუქეს ეუთოს ეგიდით მომუშავე საერთაშორისო დამკვირვებლების წინასწარი შედეგები.
არჩევნები ”მაღალი ხარისხის იყო, რომლის დროსაც ეუთოს და ევროპის საბჭოს ვალდებულებათა უმეტესობა შესრულდა”, - განაცხადა საერთაშორისო სადამკვირვებლო მისიამ.
ტელეკომპანია ”რუსთავი 2”-მა მხოლოდ მოკლედ მოიხსენია საერთაშორისო დამკვირვებლები, როდესაც ტელეკომპანიის ჟურნალისტმა განაცხადა თავის რეპორტაჟში კიევიდან: ”ეუთოს სადამკვირვებლო მისია უკვე გამოხატავს თავის პოზიციას უკრაინის არჩევნების დროს დაფიქსირებული დარღვევების შესახებ”.
ქართული ნაციონალური ტელევიზიების მიერ უკრაინის საპრეზიდენტო არჩევნების გაშუქებაში დომინირებდა ის ინციდენტები, რომლებიც ქართულ გადამღებ ჯგუფებს შეემთხვათ, ასევე იმ საკითხებზე, რომლებიც არარეგისტრირებულ ქართველ დამკვირვებლებს ეხებოდათ.
”ის ქართველი დამკვირვებლები, რომლებიც უკვე დაბრუნდნენ უკრაინიდან, აცხადებენ, რომ არჩევნები სერიოზული დარღვევებით ჩატარდა,” - განაცხადა ”რუსთავი 2”-მა.
საზოგადოებრივი მაუწყებლის პირველი არხის ჟურნალისტმა კი განაცხადა დონეცკიდან: ”როგორც მოსალოდნელი იყო, გაყალბების ყველაზე მაღალი დონე დონეცკში იყო”.
იმავდროულად, პრეზიდენტმა სააკაშვილმა განაცხადა 18 იანვარს, რომ საქართველოს გადაწყვეტილება 2 000 დამკვირვებლის უკრაინაში გაგზავნის თაობაზე, ”წინასწარ იყო შეთანხმებული უკრაინის ყველა პოლიტიკურ პარტიასთან”.
”შესაბამისად, ყველასგან მიღებული გვქონდა დასტური და თანხმობა,” - განუცხადა მან ჟურნალისტებს ბაკურიანში, ”რა თქმა უნდა, არჩევნების მეორე ტურის წინ ჩვენ კიდევ ერთხელ ვკითხავთ მათ სურთ თუ არა ჩვენი მეთვალყურეების ჩართვა, მაგრამ ეს მათი გადასაწყვეტია”.
”ეს ხალხი ჩვენ უკრაინელების თხოვნით გავგზავნეთ, უკრაინელი ხალხის აბსოლუტური უმრავლესობა მათ ჩასვლას მთელი სულით და გულით მიესალმებიან,” - განაცხადა სააკაშვილმა.
მან უარყო პარტია რეგიონების განცხადებები იმასთან დაკავშირებით, რომ საქართველომ ”სპორტული აღნაგობის მამაკაცები” ”არჩევნების დესტაბილიზაციის მიზნით” გააგზავნა.
”ჩვენი ერთადერთი მიზანი არის არა მათ პოლიტიკაში ჩარევა - ჩვენ არც ამის რესურსი გვაქვს, არც სურვილი და არც ინსტრუმენტები, არამედ, როგორც მათ გვთხოვეს, უკრაინელი ხალხისთვის მაქსიმალური სოლიდარობისა და დახმარების აღმოჩენა,” - განაცხადა სააკაშვილმა.
