RSS
Mobile
Twitter
Facebook
საქართველო და ამერიკის შეერთებული შტატები ორმხრივი ურთიერთობების ”ახალ ეტაპზე” გადაყვანაზე მუშაობენ, რაც საქართველოსთვის უსაფრთხოების გარანტიებს უზრუნველყოფს, განაცხადა საქართველოს მომავალმა ელჩმა აშშ-ში ბათუ ქუთელიამ 17 დეკემბერს.
”ურთიერთობის ახალ ეტაპს ექნება თავისი ჩარჩოები, თუ რა ფორმის და რა შინაარისისაა ეს ჩარჩოები, ცოტახანში გავიგებთ. ამჟამად მიმდინარეობს მოსამზადებელი სამუშაოები,” - განუცხადა ბათუ ქუთელიამ, თავდაცვის მინისტრის ყოფილმა მოადგილემ, ტელეკომპანია ”იმედს”.
”ჩვენ გვაქვს ჩვენი მოსაზრებები, რომელსაც ინტენსიურად ვუზიარებთ ჩვენს ამერიკულ კოლეგებს. მათაც აქვთ თავიანთი ხედვა. ბუნებრივია, ეს ყველაფერი დაკავშირებული იქნება მაინც უკვე ახალ ადმინისტრაციასთან, თუმცა ეს გარდამავალი პერიოდი ჩვენ გვინდა, რომ მაქსიმალურად გამოვიყენოთ წინასწარი საფუძვლების მოსამზადებლად და ასეთი ურთიერთობისათვის,” - განაცხადა მან.
დღესვე ტელეკომპანია ”რუსთავი 2-ისთვის” გაკეთებულ კომენტარებში ბათუ ქუთელიამ განაცხადა, რომ ამგვარი ხელშეკრულება იქნება ”ერთადერთი გარანტია ჩვენი უსაფრთხოების და ტერიტორიული მთლიანობისთვის იმდენად, რამდენადაც ამერიკის შეერთებული შტატები დღეისათვის არის საერთაშორისო არენაზე მოქმედი ყველაზე ძლიერი და გავლენიანი აქტორი”.
”მიმდინარეობს აქტიური მოლაპარაკებები ჩარჩო ხელშეკრულებაზე საგარეო საქმეთა და თავდაცვის სამინისტროს მონაწილეობით,” - განაცხადა საგარეო საქმეთა მინისტრის მოადგილემ ნინო კალანდაძემ 17 დეკემბერს.
აშშ-ს სახელმწიფო მდივნის მოადგილის თანაშემწემ მეთიუ ბრაიზამ 16 დეკემბერს თბილისში განაცხადა, რომ საქართველო და ამერიკის შეერთებული შტატები მუშაობენ იმაზე, თუ როგორ ასახონ ორმხრივი სტრატეგიული პარტნიორობა რეალურ ქმედებებში.
”ის, რაზეც დეტალურად ვისაუბრეთ [საქართველოს ხელისუფლების წარმომადგენლებთან], არის აშშ-საქართველოს თანამშრომლობა უსაფრთხოების და სტრატეგიულ პარტნიორობაზე,” - განაცხადა მან. ”ჩვენ კვლავ ვმუშაობთ იმაზე, თუ როგორ ავსახოთ ეს მშვენიერი სიტყვები - სტრატეგიული პარტნიორობა - ჩვენს რეალურ ქმედებებში, რეალურ ცხოვრებაში”.
სწორედ ქართული მხარე იყო პირველი, ვინც გაახმოვანა ინფორმაცია ამერიკის შეერთებულ შტატებთან შესაძლო ორიმხრივი ხელშეკრულების თაობაზე. გაზეთი ”24 საათი” იტყობინებოდა 15 დეკემბერს, რომ შეთანხმების პროექტი უკვე არსებობს. ”უკვე გაჟონა ინფორმაციამ იმის შესახებ, რომ ვაშინგტონსა და თბილისს შორის ორმხრივ ხელშეკრულებას ხელი უახლოეს მომავალში მოეწერება,” - წერს გაზეთი.
შემდეგ ამ საკითხზე ასევე ისაუბრეს დეპუტატებმა საპარლამენტო უმცირესობიდან ბრაიზასთან შეხვედრის შემდეგ.
”საჭიროა ორმხრივი თანამშრომლობა, რომელიც შესაძლოა ასევე მოიცავდეს პოლიტიკურ-სამხედრო თანამშრომლობას და მოვუწოდებთ საქართველოს და აშშ-ს მთავრობებს დაუყონებლივ დაიწყონ ამ საკითხზე მუშაობა,” - განაცხადა დეპუტატმა ქრისტიან-დემოკრატიული პარტიიდან ლევან ვეფხვაძემ შეხვედრის შემდეგ 16 დეკემბერს.
იმავე დღეს პარლამენტის თავდაცვისა და უსაფრთხოების კომიტეტის თავმჯდომარემ, დეპუტატმა გივი თარგამაძემ განუცხადა ”რუსთავი 2”-ს, რომ სავარაუდო შეთანხმება ”მოიცავს პრაქტიკულად ყველა სფეროს”.
”რაც ჩვენთვის ყველაზე მიმზიდველი და მნიშვნელოვანია, ის მოიცავს სამხედრო თანამშრომლობის სფეროს. მოიცავს შესაბამისად ჩვენი შეიარაღებული ძალების შემდგომი აღჭურვისა და განვითარების სფეროს, და ასევე - როგორც არის პროექტში ფორმირებული მე იმ სიტყვებით ვიტყვი - საფრთხეების ერთობლივი დაძლევისთვის განსაზღვრულ ყველა ღონისძიებას,” - განაცხადა თარგამაძემ.
მოგვიანებით პრესკონფერენციაზე საუბრისას მეთიუ ბრაიზამ განაცხადა, რომ მთავარი მიზანია საქართველოს დახმარება ნატოს წევრობისთვის საჭირო კრიტერიუმების შესრულებაში. ”ამის გარდა დეტალებზე ვერ ვისაუბრებდი, რადგანაც ჩვენ კვლავაც ვამუშავებთ ჩვენს იდეებს,” - განაცხადა ბრაიზამ და დასძინა, რომ არანაირი ხელშეკრულება ჯერჯერობით არ არსებობს.
ახალი მემარჯვენეების ლიდერმა დავით გამყრელიძემ განაცხადა 16 დეკემბერს, რომ ამ საკითხთან დაკავშირებით სიფრთხილეა საჭირო, ”რადგანაც ჩვენ შესაძლოა შემდგომი საფრთხე შევუქმნათ საქართველოს ამ საკითხზე ლაპარაკით, რადგანაც საქმე გვაქვს აბსოლუტურად არაპროგნოზირებად და საშიშ მეზობელთან - რუსეთთან”.
”რუსეთის რეაგირება შეიძლება იყოს არამართებული ამგვარ საჯარო განცხადებებზეც კი,” - განაცხადა მან.
”ჩვენ ვერ ვიტყვით უარს სტრატეგიულ პარტნიორობაზე ჩვენს მთავარ პარტნიორთან მხოლოდ იმის გამო, რომ ამან შეიძლება რუსეთი გააღიზიანოს,” - განაცხადა ბათუ ქუთელიამ.
