აჭარის უმაღლეს საბჭოს 3 ნოემბრის არჩევნებში მონაწილე ექვსი პოლიტიკური სუბიექტიდან მხოლოდ ნაციონალურმა მოძრაობამ და გიორგი თარგამაძის ქრისტიან-დემოკრატებმა გადალახეს  5%-იანი ბარიერი.

წინასწარი მონაცემების მიხედვით, რომელიც ცესკოს ვებ-გვერდზე გამოქვეყნდა,  მმართველმა პარტიამ ხმათა 78.82%, ხოლო ქრისტიან-დემოკრატებმა - 14.71% მოიპოვეს.

2% და ნაკლები მაჩვენებელი აქვთ დანარჩენ პოლიტიკურ პარტიებს: ჩვენ თვითონ, ქართული დასი, მრეწველები და ერთიანი კომუნისტური პარტია. ეს მონაცემები ეყრდნობა 334-დან 328 (მათ შორის 3 უბნის შედეგი გაუქმდა) უბნის დათვლის შედეგებს.

აჭარის უმაღლესი საბჭოს მაჟორიტარულ არჩევნებში დამაჯერებლად ლიდერობენ ნაციონალური მოძრაობის კანდიდატები იმ ხუთი ოლქის (ბათუმი, ქედა, ქობულეთი, შუახევი, ხულო) წინასწარი მონაცემებით, რომელიც ცესკოს ვებ-გვერდზე გამოქვეყნდა. ჯერ-ჯერობით უცნობია რომელი პარტიის კანდიდატი იმარჯვებს ხელვაჩაურის ოლქში. 

3 ნოემბრის არჩევნებზე აჭარელი ამომრჩევლის 44.9%-იანი აქტივობა დაფიქსირდა.

აჭარის უმაღლესი საბჭოს მიერ ივლისში მიღებული საკანონმდებლო ცვლილებების მიხედვით,  ავტონომიური რესპუბლიკის პარლამენტში ადგილების რაოდენობა 30-დან 18-მდე შემცირდა.

18 წევრიდან ექვსი მაჟორიტარული სისტემით აირჩევა. კანდიდატი, რომელიც სხვებზე მეტ ხმას მიიღებს, თუმცა არანაკლებ ხმების 1/3-სა, გამარჯვებულად გამოცხადდება. დანარჩენ 12 ადგილს პროპორციული სისტემით არჩეული დეპუტატები დაიკავებენ. საარჩევნო ბარიერი 7%-დან 5%-მდე შემცირდა.

ძირითადმა ოპოზიციურმა პარტიებმა ბოიკოტი გამოუცხადეს აჭარის არჩევნებს ისევე, როგორც მათ მონაწილეობა არ მიიღეს საქართველოს პარლამენტის შუალედურ არჩევნებში. საქართველოს პარლამენტის მაჟორიტარულ არჩევნებში არ მიიღო მონაწილეობა ასევე მმართველმა პარტიამაც.

3 ნოემბრის შუალედური არჩევნების წინასწარი შედეგების მიხედვით, ვაკის რაიონში ხმათა უმეტესობა დააგროვა ქრისტიან-დემოკრატების კანდიდატმა თამაზ კვაჭანტირაძემ, ხოლო დიდუბეში დამაჯერებლად ლიდერობს ეროვნულ-დემოკრატიული პარტიის (ედპ) მაჟორიტარი დეპუტატობის კანდიდატი გურამ ჩახვაძე.

თუ ცესკოს ეს წინასწარი მონაცემები არ შეიცვლება, პარლამენტში მეშვიდე წევრი დაემატებათ ქრისტიან-დემოკრატებს, ხოლო ედპ, რომელიც ანტიკრიზისული საბჭოს წევრია, თითქმის ათწლიანი პაუზის შემდეგ ისევ წარმოდგენილი იქნება საქართველოს პარლამენტში, სადაც მას მხოლოდ ერთი დეპუტატი ეყოლება.

ოფიციალური ინფორმაციით, ამომრჩეველთა აქტივობა ვაკეში 7.6%, ხოლო დიდუბეში 11.4%-ს შეადგენდა. კანონით არ დგინდება ამომრჩეველთა აქტივობის ზღვარი იმისათვის, რომ არჩევნები ჩატარებულად ჩაითვალოს.