Civil.ge-ს შესახებ
Eng | ქარ | Рус
ბოლო განახლება: 09:34 - 12 დეკ.'17
RSS
Mobile
Twitter
Facebook
გირგვლიანის საქმის სასამართლო განხილვა მთავრდება, თუმცა კითხვები მაინც რჩება
/ 5 ივლ.'06 / 21:03
სივილ ჯორჯია

თბილისის საქალაქო სასამართლოს მიერ საბოლოო განაჩენის გამოტანამდე ერთი დღით ადრე, 5 ივლისს სანდრო გირგვლიანის მკვლელობის საქმეში მთავარმა მოწმემ ახალი ჩვენება მისცა და ხელი შინაგან საქმეთა სამინისტროს ყოფილ თანამშრომელს დაადო.

გირგვლიანის მკვლელობის საქმე მას შემდეგ მოექცა ქართული პოლიტიკის ყურადღების ცენტრში, რაც ტელეკომპანია "იმედმა“ თებერვალში გაუშვა სიუჟეტი, რომლის მიხედვითაც შინაგან საქმეთა სამინისტროს რამდენიმე მაღალჩინოსანი შესაძლოა პირდაპირ კავშირში ყოფილიყო მკვლელობის საქმესთან. ამას მოჰყვა ოპოზიციის მოთხოვნა შინაგან საქმეთა მინისტრის ვანო მერაბიშვილის გადადგომის შესახებ. ეს მოთხოვნა დღემდე ძალაშია.

ლევან ბუხაიძემ, სანდრო გირგვლიანის მეგობარმა, რომელიც 28 იანვარს მსხვერპლთან ერთად იმყოფებოდა ოქროყანაში სადაც დანაშაული მოხდა, 5 ივლისს სასამართლოს განუცხადა, რომ შინაგან საქმეთა სამინისტროს ყოფილი თანამშრომელი ოლეგ მელნიკოვი იმ ოთხ პიროვნებას შორის იყო, რომელთაც ის და სანდრო გირგვლიანი სასტიკად სცემეს.

"ვაკვირდები ამ ადამიანს [მიხეილ ბიბილურს], რომელიც ამ გალიაში ზის ახლა და დარწმუნებით შემიძლია ვთქვა, რომ ეს ადამიანი მე იქ [ოქროყანაში] არ მინახავს. დღეს შემიძლია დარწმუნებით ვთქვა სასამართლოს წინაშე: გამომდინარე იქიდან, რომ საუბრიდან, მოძრაობიდან და შემდეგ უკვე ჩანაწერებიდან გამომდინარე, მე აღვიდგინე ოქროყანაში მყოფი მეოთხე ადამიანი და დადასტურებით მინდა ვთქვა, რომ ეს იყო ოლეგ მელნიკოვი“, – განაცხადა თბილისის საქალაქო სასამართლოში 5 ივლისს ლევან ბუხაიძემ.

ამჟამად, შსს-ს კონსტიტუციური უსაფრთხოების დეპარტამენტის პირველი განყოფილების ყოფილი უფროსი გია ალანია და ამავე დეპარტამენტის კიდევ ყოფილი სამი თანამშრომელი - ავთანდილ აფციაური, ალექსანდრე ყაჭავა და მიხეილ ბიბილური - ეჭვმიტანილები არიან პიროვნებისთვის განზრახ დაზიანებების მიყენებაში, რამაც გირგვლიანის გარდაცვალება გამოიწვია. 5 ივლისს პროკურატურის წარმომადგენლებმა ალანიასთვის ცხრა წლით, ხოლო დანარჩენებისთვის რვა-რვა წლის თავისუფლების აღკვეთა მოითხოვეს.

გირგვლიანის საქმის გახმაურების პირველივე დღიდან მელნიკოვის პიროვნება ყურადღების ცენტრში მოხვდა.

ოლეგ მელნიკოვი იმ ოფიციალურ პირებს ახლდა, რომლებიც თბილისში "შარდენ–ბარში" 27-28 იანვარის ღამეს იმყოფებოდნენ: კონსტიტუციური უსაფრთხოების დეპარტამენტის ყოფილი უფროსი დათა ახალაია, შსს–ს გენერალური ინსპექციის ყოფილი უფროსი ვასილ სანოძე, შსს-ს საზოგადოებასთან ურთიერთობების სამსახურის ყოფილი უფროსი გურამ დონაძე და ასევე შს მინისტრის მეუღლე თაკო სალაყაია. სანდრო გირგვლიანის მეგობარი თამარ მაისურაძე იმავე მაგიდასთან იჯდა.

თამარ მაისურაძემ სასამართლოს განუცხადა, რომ როდესაც კაფეში გირგვლიანი შემოვიდა ის სხვა მაგიდასთან გადაჯდა, რათა მას დალაპარაკებოდა. მაისურაძემ ასევე განაცხადა, რომ გირგვლიანი ემოციურად საუბრობდა და დონაძეს შეურაცხყოფას აყენებდა. 30 ივნისს გამართულ სასამართლო პროცესზე დონაძემ და შსს-ს ყოფილმა მაღალჩინოსნებმა, ასევე მინისტრის მეუღლემ განაცხადეს, რომ მათ არაფერი გაუგიათ, რადგანაც მუსიკა კაფეში ხმამაღლა უკრავდა. მაისურაძემ ასევე განუცხადა სასამართლოს, რომ ის დაბრუნდა თავის მაგიდასთან, რადგანაც გირგვლიანი წასვლას აპირებდა.

მაისურაძის თქმით, მელნიკოვმა შარდენ ბარიდან გირგვლიანისა და მისი მეგობრის გასვლის შემდეგ, მაშინვე დატოვა კაფე სიგარეტის ყიდვის მოტივით და უკან დაახლოებით 40 წუთში დაბრუნდა.

გირგვლიანის ოჯახის ადვოკატი შალვა შავგულიძე აცხადებს, რომ მთავარი მიზეზი, თუ რატომ დატოვა მელნიკოვმა კაფე, იყო გირგვლიანის დადევნება და მისი "დასჯა“, რადგანაც შსს-ს ყოფილმა ჩინოვნიკებმა გაიგონეს, თუ როგორ ლანძღავდა გირგვლიანი დონაძეს.

ეს არ არის პირველი ჩვენება, რომელიც ლევან ბუხაიძემ მელნიკოვის შესახებ მისცა. 28 თებერვალს დეპუტატმა ოპოზიციური "კონსერვატორული" პარტიიდან ზვიად ძიძიგურმა პრეს-კონფერენცია მოიწვია, სადაც გირგვლიანის მეგობრის ლევან ბუხაიძის - თვითმხილველის ვიდეო–ინტერვიუ აჩვენა. ინტერვიუ თავად ძიძიგურმა ჩაწერა. ინტერვიუს მსვლელობისას ძიძიგური უჩვენებს ბუხაიძეს ახალგაზრდა კაცის ფოტოს და სთხოვს მას ამოიცნოს იგი. ბუხაიძე პასუხობს, რომ ფოტოზე გამოსახული პიროვნება ძალიან ჰგავს იმ ოთხი პიროვნებიდან ერთ-ერთს, რომლებმაც ორი მეგობარი ოქროყანაში გატაცების შემდეგ სცემა. "100%-ით დარწმუნებული არ ვარ“, - დასძინა მან. ფოტოზე აღბეჭდილი პიროვნება ოლეგ მელნიკოვი იყო.

თუმცა, მატრში, როდესაც ოთხი ეჭვმიტანილი დააპატიმრეს, ლევან ბუხაიძემ ვერ ამოიცნო ოლეგ მელნიკოვი პოლიციაში ოთხ პირს შორის ამოცნობის პროცედურის დროს.   თუმცა, ბუხაიძემ მაშინ განაცხადა, რომ ის ფაქტი, რომ მან ვერ შეძლო მელნიკოვის ამოცნობა, არ ნიშნავს, რომ ეს უკანასკნელი არ იყო ომ ოთხ პირს შორის, რომელთაც სასტიკად სცემეს ის და მისი მეგობარი.

თბილისის პროკურორმა გიორგი ღვინიაშვილმა 5 ივლისს განაცხადა, რომ მიუხედავად იმისა, რომ პროკურატურა შეისწავლის ბუხაიძის ახალ ჩვენებას, ეს ვერ გახდება მიზეზი მთლიანი საქმის ხელახალი გამოძიებისა.

ბუხაიძემ 5 ივლისს ჟურნალისტებს განუცხადა, რომ მასზე პროკურატურა გარკვეულ ზეწოლას ახდენდა, რაც გახდა იმის მიზეზი, რომ მან თავი შეიკავა თავიდანვე პირდაპირ ხელი დაედო მელნიკოვზე. 

ასევე 5 ივლისს გირგვლიანის ოჯახის ადვოკატმა პროცესზე ახალი მოწმე, გირგვლიანის მეგობარი ზაალ ქუციკაშვილი მოიწვია, რომელიც იმ დღეს ასევე იმყოფებოდა კაფეში. ზაალ ქუციკაშვილი აქამდე არ დაუკითხავს გამოიძიებას, მიუხედავად იმისა, რომ ზოგიერთმა მოწმემ განაცხადა, რომ ის ასევე იმყოფებოდა შარდენ ბარში. ქუციკაშვილმა სასამართლოს განუცხადა, რომ მან დაინახა, როგორ ელაპარაკებოდა გირგვლიანი ვიღაცას იმ მაგიდასთან, სადაც შსს-ს ყოფილი მაღალჩინოსნები ისხდნენ.

შალვა შავგულიძის თქმით, ქუციკაშვილის მიერ მიცემულმა ჩვენებამ დაადასტურა ის განცხადება, რომ ინციდენტი კაფეში დაიწყო და არა მის გარეთ, როგორც ამას ეჭვმიტანილები და პროკურორები აცხადებენ. გამომძიებელთა თქმით, ინციდენტი მსხვერპლსა და ეჭვმიტანილებს შორის შარდენ ბარის გარეთ სპონტანური შელაპარაკების შედეგი გახდა და უარყვეს რომ მკვლელობა კაფეში მჯდომმა მაღალჩინოსნებმა დაუკვეთეს.

მოსამართლე გიორგი ჩემიამ არ დააკმაყოფილა ადვოკატ შალვა შავგულიძის შუამდგომლობა ახალი სამხილების გაჩენასთან დაკავშირებით საბოლოო განაჩენის გამოცხადების გადადების თაობაზე. მოსამართლის განცხადებით, იგი განაჩენს 6 ივლისს გამოაცხადებს.

მოსამართლემ და პროკურორებმა ასევე არ დააკმაყოფილეს გირგვლიანის ოჯახის ადვოკატის მოთხოვნა შს მინისტრის მეუღლის და შსს-ს ყოფილი მაღალჩინოსნების მობილური სატელეფონო საუბრების ჩანაწერების გამოქვეყნების თაობაზე. უარის შემდეგ შავგულიძემ მოსამართლე ტენდენციურობაში დაადანაშაულა და მისი შეცვლა მოითხოვა.

შავგულიძემ განაცხადა, რომ სასამართლოს, რომელიც პროკურატურის მითითებებს ასრულებს, სურს დამალოს დეტალები და ინციდენტის სამხილები და ჩქარობს განაჩენის გამოტანას.

ამავე თემაზე
უახლესი ამბები
12 დეკ.'17 02:01
კიევის სასამართლომ სააკაშვილი გაათავისუფლა
სასამართლომ არ დააკმაყოფილა პროკურატურის შუამდგომლობა სააკაშვილისთვის ორთვიანი შინაპატიმრობის შეფარდების თაობაზე.
11 დეკ.'17 17:42
კობახიძე: პრეზიდენტის არჩევა 300-წევრიანი საარჩევნო კოლეგიის მიერ ‘ძალაში რჩება’
მისი თქმით, სისტემას ხარვეზები გააჩნია, თუმცა მმართველმა პარტიამ გადაწყვიტა, რომ „პოლიტიკური კომპრომისის“ სახით ის ძალაში დატოვოს. 
11 დეკ.'17 17:27
ნარკოპოლიტიკის ლიბერალიზაციის მოთხოვნით თბილისში აქცია გაიმართა
აქციის მონაწილეებმა ნარკოპოლიტიკის საკითხზე პარლამენტში ინიცირებული საკანონმდებლო ცვლილებათა პაკეტის მიღება მოითხოვეს.
11 დეკ.'17 13:12
საქსტატი: 2017 წლის მესამე კვარტალში პირდაპირმა უცხოურმა ინვესტიციებმა 594 მლნ აშშ დოლარი შეადგინა
პირდაპირი უცხოური ინვესტიციების ყველაზე დიდი ოდენობა საქართველომ 2017 წლის მესამე კვარტალში აზერბაიჯანიდან მოიზიდა.
09 დეკ.'17 18:26
ეუთოში საქართველოს მეგობარი ქვეყნების ჯგუფი რუსული ოკუპაციის ფონზე მხარდაჭერას უსვამს ხაზს
სხვა საკითხებთან ერთად ჯგუფი ეთნიკური დისკრიმინაციის, რუსეთის სამხედრო ძალების გაძლიერების საკითხებზე საუბრობს.
09 დეკ.'17 14:34
უკრაინის ეროვნულმა პოლიციამ სააკაშვილი დააკავა
ექს-პრეზიდენტმა შიმშილობა დაიწყო და შესაძლოა შინაპატიმრობა შეეფარდოს.
08 დეკ.'17 17:21
ჯანელიძე ეუთოს საგარეო საქმეთა მინისტრთა საბჭოს სხდომაში მონაწილეობს
საგარეო საქმეთა მინისტრმა ოკუპირებულ ტერიტორიებზე არსებულ დარღვევებზე ისაუბრა და მოუწოდა, რომ შეიქმნას ევროპა გავლენის სფეროების გარეშე.
08 დეკ.'17 11:45
საგარეო საქმეთა სამინისტრო იერუსალიმთან დაკავშირებულ მოვლენებს ეხმაურება
სამინისტროს განცხადება მოჰყვა მმართველი პარტიის დეპუტატის ინიციატივას იერუსალიმის ისრაელის დედაქალაქად აღიარების თაობაზე.
07 დეკ.'17 19:32
პარლამენტმა მთავრობის სტრუქტურულ რეორგანიზაციას მხარი დაუჭირა
ცვლილებების ფარგლებში, რამდენიმე სამინისტრო შერწყმა და რეორგანიზაცია მოხდება.
07 დეკ.'17 17:02
კვირიკაშვილი იერუსალიმის შესახებ ღია წერილის გამო დეპუტატს საყვედურობს
პრემიერ-მინისტრმა უარყო დეპუტატის მოწოდება, რომ საქართველომ იერუსალიმთან დაკავშირებით პრეზიდენტ ტრამპის გადაწყვეტილება გაიზიაროს.

სივილ ჯორჯიას შესახებ
Civil.Ge © 2001-2017, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
79